Ինքնության վերադարձի ճանապարհին

Հունիսի 3-ին Չարենցավանի Սուրբ Փրկիչ եկեղեցում մկրտվեց մեր սիրելի հայրենակից Կարոտ Սասունյանը, ով երկար տարիներ է, ինչ բռնել էր հայկական ինքնությանը վերադառնալու ուղին։

Կ. Սասունյանը ծնվել է Սասուն աշխարհի  Փասուր գյուղում՝ Խոլփի գավառակ: Բնակվում է Տիգրանակերտ (Դիարբեքիր) քաղաքում, զբաղվում է լուսանկարչությամբ և թղթակցում է մեր կայքին։ Հետամուտ լինելով սեփական ակունքների որոնմանը՝ նա տարիներ շարունակ զբաղված է Սասուն գավառի հայկական եկեղեցիներ և այլ հուշարձաններ հետազոտելով և դրանք լուսանկարելով: Երազում է առաջիկայում դրանք հրատարակել առանձին գրքով: 

-Վաղուց էի որոշել մկրտվել, արդեն ժամանակն էր, – ասում է նա, – սակայն իմ ծննդավայրի  եկեղեցին, որտեղ ուզում էի մկրտվել, ցավոք խոնարհված վիճակում է, ուստի որոշեցի Հայաստանում իրականացնել իմ վաղեմի երազանքը։

Մաղթենք, որ մեր հայրենակցի այս քայլը հույսի և լույսի կանթեղներ վառի մեր մյուս տարաբախտ ազգակիցների սրտերում՝ դեպի իրենց ինքնություն վերադարձի դժվարին ճանապարհին:

Տիգրան Չանդոյան

www.akunq.net