Հնդկաստանի և Պակիստանի սահմանին գրեթե մեկ շաբաթվա ընթացքում առաջին անգամ գիշերը հանգիստ է անցել

Գրեթե մեկ շաբաթվա մեջ առաջին անգամ Քաշմիրի հովիտը խաղաղ գիշեր է անցկացրել՝ առանց հրաձգության կամ անօդաչու թռչող սարքերի ձայների, այն բանից հետո, երբ շաբաթ երեկոյան Հնդկաստանի և Պակիստանի միջև հրադադարի պայմանավորվածություն է ձեռք բերվել, հայտնում է Press Trust of India-ն։

«Շաբաթ երեկոյան ժամը 11-ից հետո Քաշմիրում Վերահսկողության գծի երկայնքով գտնվող ոչ մի հատվածից հրադադարի ռեժիմի խախտման մասին հաղորդումներ չեն ստացվել», - հայտնել են պաշտոնյաները հնդկական ԶԼՄ-ին։

Հնդկաստանն ու Պակիստանը պայմանավորվել են դադարեցնել կրակը Վերահսկողության գծի և Միջազգային սահմանի երկայնքով՝ շաբաթ երեկոյից։ Այս քայլը ձեռնարկվել է այն բանից հետո, երբ անցյալ շաբաթ Հնդկաստանի զինված ուժերը հարվածներ էին հասցրել Պակիստանում և Պակիստանի կողմից օկուպացված Քաշմիրում գտնվող ահաբեկիչների հենակետերին՝ ի պատասխան Փահալգամում տեղի ունեցած մահաբեր ահաբեկչության, որի հետևանքով 26 մարդ էր զոհվել։

Թեև գիշերն անցել է հանգիստ, շաբաթ երեկոյան Քաշմիրի հովտի երկնքում տասնյակ անօդաչու թռչող սարքեր են նկատվել, ինչը հրադադարի պայմանավորվածության խախտում էր։ Պակիստանը խախտել է հրադադարի համաձայնագիրը՝ շաբաթ օրը Հնդկաստանի և Պակիստանի միջև հրադադարի պայմանավորվածություն ձեռք բերելուց մի քանի ժամ անց։