Արդյո՞ք վարակված են ագրարային համալսարանի անասունները

Կոտայքի մարզի Բալահովիտ համայնքում տարածված լուրերի համաձայն՝ բրուցելոզի դեպքեր են արձանագրվել Հայաստանի ազգային ագրարային համալսարանի «Բալահովիտ» ուսումնափորձնական տնտեսությունում: Ընդ որում վարակված են թե՛ խոշոր, թե՛ մանր եղջերավոր կենդանիներ: 

Yerkir.am-ը հարցում է ուղարկել Սննդամթերքի անվտանգության տեսչական մարմնին՝ պարզելու հիվանդության հետ կապված մանրամասները: Կարծում ենք, որ ընթերցողներին ևս կհետաքրքրի իմանալ կենդանիների վարակման պատճառները, հիվանդ կենդանիների հետագա ճակատագիրը, ինչպես նաև արդյո՞ք կիրառվում են սահմանափակումներ ուսանողների և դասախոսների ֆերմաներ այցելության հետ կապված: 

Զարմանալին այն է, որ եթե հավատանք ԿԳՄՍ նախարար Ժաննա Անդրեասյանի և ռեկտոր Հրաչյա Զաքոյանի՝ բուհի «աննախադեպ» զարգացման մասին հավաստիացումներին, պետք է, որ համալսարանի ուսումնափորձնական տնտեսությունը լիներ օրինակելի և հնարավորինս զերծ նմանատիպ հիվանդություններից: Հիշեցնենք, որ բրուցելոզը զոոնոզ հիվանդություն է, վարակը մարդկանց փոխանցվում է վարակված կենդանիներից: