ԿԳՄՍ նախարարի ամբիցիաները`վարչապետի նկատմամբ. ՀՀ բոլոր պետական բուհերի կառավարման խորհուրդներում խախտված է ձևավորման կարգը

ՀՀ կառավարության «ՀՀ պետական բարձրագույն ուսումնական հաստատության խորհրդի ձևավորման կարգը հաստատելու մասին» 23.06.2005 թ. թիվ 975-Ն որոշման համաձայն՝ բուհի խորհրդի 20 անդամներից 5-ին կամ 25%-ին առաջադրում է հիմնադիրը, 5-ին՝ լիազոր մարմինը:

Հիմնադրի անունից խորհրդի անդամներ է առաջադրում Հայաստանի Հանրապետության վարչապետը՝ պետական պաշտոն և պետական ծառայության պաշտոն զբաղեցնող անձանցից: Լիազոր մարմնի կողմից խորհրդի անդամներ են առաջադրվում կրթության, գիտության, մշակույթի, սպորտի և տնտեսության տարբեր ոլորտների ներկայացուցիչներ:

Yerkir.am-ը ուսումնասիրել է ՀՀ պետական բոլոր բուհերի խորհուրդների կազմը: ԿԳՄՍ նախարարությունը ոչ միայն առաջադրել է լիազոր մարմնի համար սահմանված 5 անդամին, այլ նաև ԿԳՄՍ նախարարության կամ համակարգի աշխատակիցներին առաջադրել է հիմնադրի (իմա՝ վարչապետի) 25%-ի մասնաբաժնում:

Ստորև ներկայացնում ենք ԿԳՄՍ նախարության փաստացի ներկայացվածությունը բոլոր պետական բուհերի խորհուրդներում ըստ անդամների թվաքանակների և տոկոսների.

1. Երևանի պետական համալսարան – 6 անդամ կամ 30%,
2. Հայկական պետական մանկավարժական համալսարան – 9 անդամ կամ 45%,
3. Հայաստանի ազգային ագրարային համալսարան – 8 անդամ կամ 40%,
4. Հայաստանի ազգային պոլիտեխնիկական համալսարան – 7 անդամ կամ 35%,
5. Ճարտարապետության և շինարարության Հայաստանի ազգային համալսարան – 7 անդամ կամ 35 տոկոս,
6. Հայաստանի պետական տնտեսագիտական համալսարան – 7 անդամ կամ 35%,
7. Վ. Բրյուսովի անվան պետական համալսարան – 8 անդամ կամ 40%,
8. Շիրակի Մ. Նալբանդյանի անվան պետական համալսարան – 7 անդամ կամ 35%,
9. Վանաձորի Հ.Թումանյանի անվան պետական համալսարան – 7 անդամ կամ 35 տոկոս,
10. Երևանի Կոմիտասի անվան պետական կոնսերվատորիա – 7 անդամ կամ 35%,
11. Հայաստանի գեղարվեստի պետական ակադեմիա – 9 անդամ կամ 45%,
12. Երևանի թատրոնի և կինոյի պետական ինստիտուտ – 9 անդամ կամ 45%,
13. Երևանի Մ.Հերացու անվան պետական բժշկական համալսարան – 6 անդամ կամ 30%,  
14. Հայաստանի ֆիզիկական կուլտուրայի և սպորտի պետական ինստիտուտ – 8 անդամ կամ 40%,
15. Գավառի պետական համալսարան – 9 անդամ կամ 45%,
16. Գորիսի պետական համալսարան - 8 անդամ կամ 40%:

Ստացվում է, որ ԿԳՄՍ նախարարությունը՝ ի դեմս նախարար Ժաննա Անդրեասյանի, ի հեճուկս գործող օրենսդրության, բուհերում ներկայացված է ոչ թե սահմանված 25%-ի, այլ 30-45%-ի սահմաներում: Սա ոչ այլ ինչ է, քան առերևույթ «ուզուրպացիա», ընդ որում, իր իսկ ղեկավարի՝ Նիկոլ Փաշինյանի հաշվին: Կարծում ենք, որ Փաշինյանին պետք է, որ անհանգստացնեն տիկին նախարարի ամբիցիաներն ու գործելաոճը:

Վ. Սարգսյան