Ռուսաստանը հրթիռային հարված է հասցրել Զապորոժիեի բնակելի տանը. մեկ մարդ զոհվել է, 24-ը՝ վիրավորվել

Հունվարի 23-ի վաղ առավոտյան ռուսական բանակը հրթիռային հարված է հասցրել Զապորոժիե քաղաքին, հայտնել է շրջանային վարչակազմի ղեկավար Իվան Ֆյոդորովը։ «Թշնամին կրկին հարվածում է քաղաքին։ Առնվազն չորս պայթյուն է տեղի ունեցել Զապորոժիեում... Փլատակների տակ գտնվող մարդկանց մասին նախնական տեղեկություններ կան», - գրել է Ֆյոդորովն իր թելեգրամ-ալիքում։

Ավելի ուշ նա նշել է, որ ռուսական հարձակման հետեւանքով զոհվել է տեղի 47-ամյա բնակիչ, եւս 24 մարդ վիրավորվել է, այդ թվում՝ երկու ամսական երեխա։ Զոհերի թվում են Ուկրաինայի արտակարգ իրավիճակների պետական ​​ծառայության չորս աշխատակիցներ։ Նրանք, ըստ Ֆյոդորովի, ծանր վիճակում են։ Շրջանային վարչակազմի ղեկավարը հրապարակել է նաեւ հրթիռով խոցված կիսավեր տան լուսանկարը։

Ընդհանուր առմամբ, վերջին 24 ժամվա ընթացքում ռուսական բանակը 361 հարված է հասցրել Զապորոժիեի շրջանի 10 բնակավայրերին, նշել է Ֆյոդորովը։ Բացի Զապորոժիեից, հարվածներ են ստացել Տեմիրովկան, Նովոդանիլովկան եւ Մալայա Տոկմաչկան։ Նաեւ 188 անօդաչու թռչող սարք է արձակվել շրջանի բնակեցված տարածքների վրա։ Նախօրեին՝ հունվարի 22-ին, Զապորոժիեի վրա Ռուսաստանի հարձակման հետեւանքով հրդեհ էր բռնկվել քաղաքի թաղամասերից մեկում։ Տեղի իշխանությունները չեն հստակեցրել, թե որ օբյեկտն է վնասվել: Մինչ այս ռուսական բանակը հունվարի 18-ի առավոտյան գնդակոծել էր քաղաքը։ Մեկ մարդ մահացել է, 10-ը վիրավորվել։ Վնասվել են  ենթակառուցվածքներ, բնակելի շենքեր եւ խանութներ։