Իսպանիան շուրջ 179 միլիոն եվրոյով տուգանել է 5 բյուջետային ավիաընկերությունների

Իսպանիայի սպառողների իրավունքների պաշտպանության նախարար Պաբլո Բուստինդուին հինգ բյուջետային ավիաընկերությունների տուգանել է շուրջ 179 միլիոն եվրոյով (178,933,631,99 եվրո) չարաշահումների, մասնավորապես՝ ձեռքի ուղեբեռի կամ ուղեկցող անձանց՝ հարևան նստատեղերի հավելավճարների համար, հայտնել են  գերատեսչության մամուլի ծառայությունից։

Տուգանված 5 ավիաընկերություններն են.

Ryanair-ը՝ 107 միլիոն 775 հազար 777 եվրոյով,

Vueling-ը՝ 39 միլիոն 264 հազար 412 եվրոյով,

easyJet-ը՝ 29 միլիոն 94 հազար 441 եվրոյով

Norwegian-ը՝ 1 միլիոն 610 հազար 001 եվրոյով

Volotea-ն՝ 1 միլիոն 189 հազար 99 եվրոյով:

Այսպիսով ավարտվում է 2023 թվականին Սպառողների գործերի գլխավոր տնօրինության սկսած հետաքննությունը՝ սպառողների պաշտպանության կանոնների «շատ լուրջ» խախտումների փաստերով:

Սա առաջին դեպքն է, երբ «շատ լուրջ» դասակարգված պատժամիջոցները վերջնականապես հաստատում են երկրի՝ 2022 թվականի հունիսին պատժամիջոցների լիազորություն ստացած սպառման ոլորտի գերատեսչությունը։