Հնդկաստանը հրաժարվել է պատժամիջոցներ կիրառել RT-ի դեմ՝ չնայած ԱՄՆ-ի խնդրանքին

Հնդկաստանի արտաքին գործերի նախարարությունը հրաժարվել է պատժամիջոցներ կիրառել ռուսական լրատվամիջոցների, մասնավորապես RT հեռուստաալիքի դեմ՝ չնայած ԱՄՆ պաշտոնյաների դիմումներին, հայտնում է Hindu թերթը՝ հղում անելով աղբյուրներին, փոխանցում է РИА Новости-ն։

«Թեև նախարարությունը (արտաքին գործերի նախարարությունը-խմբ.) լռություն է պահպանում այդ հարցի վերաբերյալ, կառավարության պաշտոնյաներն ասել են, որ պատժամիջոցների մասին քննարկումները կապված չեն Հնդկաստանի հետ»,- գրում է պարբերականը։

Թերթի տեղեկություններով՝ ԱՄՆ պաշտոնյաները հաղորդակցվել են նախարարության ներկայացուցիչների հետ՝ պատժամիջոցներին միանալու վերաբերյալ՝ հավատարմագրերը հետ կանչելու և օտարերկրյա առաքելությունների մասին օրենքին համապատասխան ռուս լրագրողներին ցուցակագրելու միջոցով: Աղբյուրները հաստատել են Hindu-ին, որ հարցը քննարկվել է վերջին երկու շաբաթվա ընթացքում։

Մոսկվայում Հնդկաստանի նախկին դեսպան Կանվալ Սիբալն ասել է, որ ռուսական լրատվամիջոցները սահմանափակելու ԱՄՆ գործողությունները վնասում են Ամերիկայի սեփական արժեքներին, թեև ԱՄՆ կառավարությունը պնդում է, որ աջակցում է խոսքի ազատությանը։

«Սա կդիտվի որպես երկակի ստանդարտ գլոբալ հարավի կողմից, որը նրանք փորձում են թիրախավորել: Հնդկաստանը, ակնհայտորեն, չի արձագանքի ամերիկյան նման ճնշմանը»,- դիվանագետի խոսքերն է մեջբերում պարբերականը։