Արթուր Ալեքսանյանը համաշխարհային ըմբշամարտի լեգենդ է. Մալխաս Ամոյան

Հայաստանի հավաքականի ներկայացուցիչ, հունահռոմեական ոճի ըմբիշ Մալխաս Ամոյանը (77 կգ) դարձել է Փարիզի ամառային օլիմպիական խաղերի բրոնզե մեդալակիր։

Մարզական լրագրող Վյաչեսլավ Աբդուսալամովի հետ հարցազրույցում Ամոյանն ասել է, որ իր հաղթանակը նվիրել է եզդի և հայ ժողովուրդներին։

«Ուզում էի օլիմպիական չեմպիոն դառնալ, բայց ինչ-որ բան պարզապես պակասում էր։ Պատրաստվելու ենք հաջորդ Օլիմպիական խաղերին»,-ասել է նա։

Մալխաս Ամոյանն ուրախ է, որ թիմին բրոնզ բերեց, բայց վստահ է, որ պետք է ուսումնասիրեն սեփական սխալները և շարունակեն աշխատել իրենց վրա։

«Փառք Աստծո, մեդալ կա, դեռ պետք է աշխատենք, աշխատենք մեր սխալների վրա»,- ընդգծեց Ամոյանը։

Անդրադառնալով Օլիմպիական խաղերի եզրափակչում Արթուր Ալեքսանյանի պարտությանը, Ամոյանն ասաց. «Արթուրը համաշխարհային ըմբշամարտի լեգենդ է, շատ էինք ուզում, որ նա դառնա օլիմպիական կրկնակի չեմպիոն, բայց չստացվեց։ Տա Աստված, որ Արսեն Հարությունյանն ու Վազգեն Թևանյանը (հայ ազատ ոճի ըմբշամարտի առաջատարներ) ոսկի վերցնեն»։