Անօդաչուների կիրառմամբ լայնածավալ զորավարժություններ Իրանում

Իրանի բանակը այսօրվանից սկսած լայնածավալ վարժանքներ է իրականացնում՝ ռազմական անօդաչու ինքնաթիռների մասնակցությամբ։ Իրանի «Ֆարս» լրատվական գործակալության տեղեկացմամբ, անօդաչու թռչող սարքերով վարժանքներին մասնակցում են բանակի ցամաքային զորքերի չորս ստորաբաժանումների՝ մասնավորապես, ցամաքային զորքերի, ռազմածովային, ռազմաօդային եւ հակաօդային պաշտպանության ուժերի զինծառայողներ:

Զորավարժությունները տեղի են ունենում Իրանի կենտրոնական ու հարավային շրջաններում։

Զորավարժության հիմնական փուլը կանցկացվի չորեքշաբթի, որի ընթացքում հետախուզական, խափանման, ոչնչացման ու մարտական բոլոր տեսակի անօդաչու սարքերը տարբեր գործողություններ կիրականացնեն։
Իրանը անօդաչուներ է մշակում 1980-ական թվականներից եւ վերջին տարիներին բարձր դիրք է զբաղեցնում ԱԹՍ–ների արտադրության ոլորտում։