կարևոր
3310 դիտում, 8 ամիս առաջ - 2023-09-17 20:56
Հասարակություն

Արմեն Ռուստամյանից, Դաշնակցությունից կախվելու փոխարեն, գեթ մեկ վայրկյան Նիկոլի դեմ իրական, անշահախնդիր պայքարով զբաղվեք. Մանուկյան

Արմեն Ռուստամյանից, Դաշնակցությունից կախվելու փոխարեն, գեթ մեկ վայրկյան Նիկոլի դեմ իրական, անշահախնդիր պայքարով զբաղվեք. Մանուկյան

Այսօր, երբ կայանում են Երեւանի ավագանու ընտրությունները, ու կամ-կամի հարց կա այս իշխանությանը հեռացնելու համար եւս մեկ հիմնավոր առիթ ստեղծելու համար, «հականիկոլականների» մի բանակ ողջ օրը մոռացել է այդ ամենն ու հարձակվել Դաշնակցության վրա։ Այս մասին գրում է ՀՀ ԱԺ պատգամավոր Գեղամ Մանուկյանը։

«Ու ոչ ավել, ոչ պակաս կասկածի տակ են դրել Դաշնակցության Բյուրոյի անդամ, երեք տասնամյակ Հայաստանի ազգային-քաղաքական ուղեգծի պաշտպանության համար պայքարած Արմեն Ռուստամյանի անկեղծությունը, սկզբունքայնությունը, ուղղամտությունը։ Դրա համար Արմենն իր պայքարում բանտարկության երկար տարիներով, զրկանքներով է վճարել և ոչ միայն… Իսկ հիմա ինչ-որ աշխատավարձային «ընդդիմադիրներ» ելել են հրապարակ։

Ի՞նչ են տարածում. ԵԽԽՎ Հայաստանի պատվիրակոթյան անդամ Արմեն Ռուստամյանը Փարիզում կայացած մոնիտորինգի հանձնաժողովի նիստից Երեւան վերադառնալիս Փարիզի օդանավակայանում զրուցում է ԵԽԽՎ Հայաստանի պատվիրակության ղեկավար Ռուբեն Ռուբինյանի հետ։ Թերեւս ՔՊ-ականի արած լուսանկարը ստանալու փոխարեն, ունենային այդ զրույցի ձայնագրությունը, կամաչեին նման էժան խաղի մասնակցել։ Եվ ընդհանրապես, ցանկացած դաշնակցական ու ղեկավար փակ կամ բաց հանդիպումներում իշխանականի կամ այլ անձի հետ զրույցում նույն բանն է ասում, որն էլ իր համոզմունքն է, ի տարբերություն շատերի։

Համոզված եմ, եթե իշխանական ՊՈԱԿ-ների եւ ֆեյքերի բանակի հետ համատեղ մղվող հակադաշնակացական այդ մոլուցքի մեկ տոկոսը «հականիկոլական» ներկայացող «ընդդիմադիրները» ուղղեին Նիկոլի դեմ, այսօր կարիք չէր լինի նիկոլի հեռացման մասին մտածեին իրական ընդդիմադիրները։

Բայց դրանց խնդիրը Նիկոլի հեռացումը չէ, ավելին՝ հարց է՝ արդյոք ցանկանո՞ւմ են Նիկոլի հեռացումն ընդհանրապես։

Արմեն Ռուստամյանը պաշտպանության կարիքը չունի էլ, իր քաղաքական կյանքը, պայքարն է նրա վահանը։

Բայց դե իշխանական կաբինետները մշտական այցելության վայր դարձրածները, քրեական գործերի պատրվակով իշխանության դեմ թթու խոսք չասողները, նրանցից աշխատավարձ ստացող «ընդդիմադիրները» մեծահոգի լռությունը ակնհայտորեն շփոթում են ու փորձում են գլուխ բարձրացնել, այդժամ պետք է ցույց տալ շրիշակից վերեւ այն մի քանի սանտիմետրը, որից ավելի իրավունք չունեն բարձրանալ։

Արմեն Ռուստամյանից, Դաշնակցությունից կախվելու փոխարեն, գեթ մեկ վայրկյան Նիկոլի դեմ իրական, ԱՆՇԱՀԱԽՆԴԻՐ պայքարով զբաղվեք ու վերջապես «վճռականություն» գոռալուց հետո դա կյանքում ցույց տվեք»։