Իրանի ՊՆ-ն՝ Սպահանում դրոններով հարձակման մասին

Իրանի պաշտպանության նախարարությունը հայտարարել է, որ հետ է մղել Սպահանում պաշտպանական համալիրի ուղղությամբ անօդաչու սարքերի հարձակումները։

Press TV-ի փոխանցմամբ՝ շաբաթ ուշ երեկոյան պայթյուն է գրանցվել Սպահանի պաշտպանական համալիրներից մեկում։

Նախարարությունը հայտնել է, որ իր համալիրներից մեկի վրա մի քանի անօդաչու թռչող սարքերի միջոցով հարձակում է տեղի ունեցել, սակայն համալիրի հակաօդային պաշտպանության համակարգերը հաջողությամբ հետ են մղել հարձակումը։ «ԱԹՍ-ներից մեկը խոցվել է համալիրի հակաօդային պաշտպանության կրակից, իսկ մյուս երկուսն ընկել են դրա պաշտպանական թակարդները եւ պայթել», - ասվում է հաղորդագրության մեջ։

Նախարարությունը նշել է, որ անհաջող հարձակումը չի հանգեցրել մարդկային կորուստների, այլ միայն չնչին վնաս է հասցրել արտադրամասի տանիքին։ Համալիրը հարձակումից հետո շարունակում է իր բնականոն աշխատանքը։

Պաշտպանության նախարարությունը վստահեցրել է, որ նման կույր հարձակումները չեն ազդի երկրի առաջընթացի ընդհանուր ուղու վրա։