Բացվել է ռուս–թուրքական մոնիթորինգային կենտրոնը. դիտարկումը կիրականացվի դրոններով

Շաբաթ Աղդամի շրջանում բացվել է հրադադարի ռեժիմը և բոլոր ռազմական գործողությունները ղարաբաղյան հակամարտության գոտում վերահսկելու ռուս-թուրքական համատեղ կենտրոնը: Ըստ «ՌԻԱ Նովոստի»-ի՝ կենտրոնը մոնիտորինգի համար օգտագործելու է անօդաչու թռչող սարքեր:

«Կենտրոնը կիրականացնի հրադադարի ռեժիմի պահպանման և կողմերի կողմից ձեռք բերված պայմանավորվածությունները խախտող գործողությունների մասին տեղեկատվությունը հավաքելու, ամփոփելու և ստուգելու աշխատանք: Վերահսկողությունը կիրականացվի անօդաչու թռչող սարքերի միջոցով...», – հայտնում է ՌԴ ՊՆ–ն։

Ռուս-թուրքական կենտրոնի բացման արարողությանը մասնակցել են Ռուսաստանի պաշտպանության փոխնախարար, գեներալ-գնդապետ Ալեքսանդր Ֆոմինը, Թուրքիայի ազգային պաշտպանության փոխնախարար Յունուս Էմրե Կարաօսմանօղլուն և Ադրբեջանի պաշտպանության նախարար Զաքիր Հասանովը:

Լեռնային Ղարաբաղի հակամարտության գոտում հրադադարի ռեժիմի վերահսկման ռուս-թուրքական կենտրոնը բացվել է Քիյամադդինլի բնակավայրի մոտակայքում՝ համաձայն Ռուսաստանի և Թուրքիայի պաշտպանության գերատեսչությունների ղեկավարների կողմից ստորագրված՝ 2020 թ. նոյեմբերի 11-ի հուշագրի:

Համատեղ կենտրոնի անձնակազմը ներկայացված է հավասարության սկզբունքով` յուրաքանչյուր կողմից մինչև 60 զինծառայող: Կենտրոնն ուղիղ կապ ունի հակամարտության կողմերի ռազմական հրամանատարության և վերահսկման մարմինների ու Ռուսաստանի խաղաղապահ զորակազմի շտաբների հետ:

Նշենք նաև, որ ավելի վաղ Ադրբեջանը հայտնում էր, որ կենտրոնը լինելու է Աղդամի շրջանում՝ նույնանուն քաղաքից 8 կմ հեռու, սակայն Քիյամադդինլի բնակավայրը սահմանից ավելի հեռու է։