Հույս կա, որ, ի վերջո, հնարավոր կլինի խաղաղության պայմանագիր կնքել Հայաստանի և Ադրբեջանի միջև.Պուտին

Հույս կա, որ, ի վերջո, հնարավոր կլինի խաղաղության պայմանագիր կնքել Հայաստանի և Ադրբեջանի միջև: Այս մասին Երևանում ընթացող ՀԱՊԿ անդամ երկրների ղեկավարների գագաթնաժողովում ելույթի ժամանակ հայտարարել է ՌԴ նախագահ Վլադիմիր Պուտինը:

Նա, մասնավորապես, անդրադարձել է հայ–ադրբեջանական հարաբերությունների կարգավորմանը և շեշտել, որ այն շատ սուր հարց է, որն ուշադրության կարիք ունի.

«Այս առումով դրական ենք գնահատում Սոչիում հոկտեմբերի վերջին կայացած հանդիպումը` բանակցությունները լավ հիմք են ստեղծել հետագա հիմնարար հարցերի լուծման համար։ Կարևորն այն է, որ բանակցությունների ժամանակ հայտարարվեց 2020-ի նոյեմբերի 9-ի եռակողմ հայտարարությանը հավատարիմ լինելու մասին»,–ասել է Պուտինը։

ՌԴ նախագահի խոսքով՝ հայ-ադրբեջանական հարաբերությունների կայուն կարգավորմանը հնարավոր է հասնել սահմանազատման և սահմանագծման շնորհիվ.

«Հուսով ենք, որ այս ամենը թույլ կտա Երևանի և Բաքվի միջև խաղաղության պայմանագրի կնքմանը հասնել: Այս հարցի շուրջ կարճ կարծիքներ ենք փոխանակել Նիկոլ Փաշինյանի հետ, բայց այդ հարցին ավելի մանրամասն էլ կանդրադառնանք»,–ասել է Պուտինը: