Ալիևն ակնկալում է, որ ընտրություններից հետո Հայաստանի իշխանությունները կհամաձայնեն Բաքվի հետ խաղաղության պայմանագիր կնքել

Ադրբեջանի նախագահ Իլհամ Ալիևը հույս ունի, որ Հայաստանի իշխանություններն  ընտրություններից հետո կհամաձայնեն Ադրբեջանի հետ խաղաղ պայմանագիր կնքել: Նրա խոսքերը մեջբերում է «Ինտերֆաքս»-ը:

«Հայաստանի կառավարությունն անտեսում է մեր ցանկացած հայտարարություն Հայաստանի հետ խաղաղության համաձայնագրի բանակցություններ սկսելու վերաբերյալ: Սակայն հնարավոր է, որ նախընտրական իրավիճակը չի նպաստել նման հայտարարություններին: Բայց հիմա՝ Հայաստանում ընտրություններից հետո, մենք դրական արձագանքի հույս ունենք»,- ասել է Ալիևը՝ ուրբաթ Բաքվում ընդունելով Ռումինիայի, Ավստրիայի և Լիտվայի արտգործնախարարներին:

Նրա խոսքով՝ պաշտոնական Բաքուն բազմիցս հայտարարել է հետկոնֆլիկտային իրավիճակից Հարավային Կովկասում խաղաղ զարգացման ու համագործակցության անցնելու ցանկության մասին:

«Ցավոք, մենք նման բան չենք լսել Հայաստանի կառավարությունից: Եթե մենք Հայաստանի հետ խաղաղության պայմանագիր չունենք, ապա խաղաղություն նույնպես չկա: Ոչ միայն երկու երկրների, այլև ամբողջ Հարավային Կովկասում խաղաղություն չկա: Մեզ պետք է խաղաղություն և կայուն զարգացում, կանխատեսումներ, պատերազմի զրո ռիսկ, մեզ պատերազմ պետք չէ: Նախկինում էլ մեզ պատերազմ պետք չէր»,- շեշտել է Ադրբեջանի ղեկավարը:

Ալիևը հույս է հայտնել, որ ԵՄ երկրների արտգործնախարարները կքննարկեն այս հարցը ՀՀ ղեկավարության հետ Երևան իրենց այցի ընթացքում:

«Որքան ես հասկանում եմ, ձեր այցը տարածաշրջան նվիրված է Հայաստանի և Ադրբեջանի միջև առկա հետկոնֆլիկտային իրավիճակին: Այլ կերպ ասած՝ հետկոնֆլիկտային իրավիճակը կարևոր է, քանի որ ես կարծում եմ, որ այս և հաջորդ տարի կմշակվեն հետհակամարտային իրավիճակի հիմնական հիմնարար մոտեցումները: Ադրբեջանի դիրքորոշումը շատ պարզ է և հստակ»,- շեշտել է Ալիևը:

Նրա խոսքով՝ «Լեռնային Ղարաբաղի հակամարտությունը կարգավորվել է, և այս հարցի շուրջ բանակցություններ վարելու անհրաժեշտություն չկա»:

Թշնամական պետության ղեկավարը նշել է, որ Ադրբեջանի, Հայաստանի և Ռուսաստանի ղեկավարների՝ 2020 թ. նոյեմբերի 10-ին ստորագրած եռակողմ հայտարարությունը միայն հրադադարի համաձայնագիր չէ:

«Յուրաքանչյուր ոք, ով կարդում է այս փաստաթուղթը, կտեսնի, որ այն ընդգրկում է շատ այլ խնդիրներ: Մենք պետք է մտածենք հետկոնֆլիկտային իրավիճակի մասին: Մենք շրջեցինք այս էջը և պատրաստ ենք առաջ շարժվել ու նպաստել տարածաշրջանային կայունությանը»,- հավելել է Ալիևը: