Քննչական կոմիտեում մեկնարկել է ինքնավար պաշտոն զբաղեցնող անձանց թեկնածուների ցուցակի համալրման գործընթացը

Հայաստանի Հանրապետության քննչական կոմիտեում մեկնարկել է ինքնավար պաշտոն զբաղեցնող անձանց թեկնածուների ցուցակի համալրման նպատակով նախատեսվող գրավոր քննության կազմակերպման գործընթացի նախապատրաստական աշխատանքների փուլը:

ՔԿ-ից  հայտնում են, որ քննչական կոմիտեում ինքնավար պաշտոն զբաղեցնող անձանց թեկնածությունների ցուցակը, օրենքով սահմանված կարգով, համալրում է քննչական կոմիտեի որակավորման հանձնաժողովը:

Հիշյալ ստորաբաժանման փոխանցմամբ՝ քննությունը նախատեսված է 2022թ. ապրիլի 27-ին, որին մասնակցելու համար պահանջվող փաստաթղթերն ընդունվում են 2022թ. մարտի 28-ից ապրիլի 20-ը ներառյալ՝ բացի շաբաթ և կիրակի օրերից:

Քննչական կոմիտեի որակավորման հանձնաժողովում ներկայումս ընթանում են գրավոր քննության արդյունավետ նախապատրաստմանն ու իրականացմանն ուղղված միջոցառումներ՝ կարևորելով գործընթացի վերաբերյալ հանրային իրազեկման ուղղությամբ պահանջվող աշխատանքների պատշաճ ապահովումը:

Հավելենք, որ Հայաստանի Հանրապետության քննչական կոմիտեում ինքնավար պաշտոն զբաղեցնող անձանց թեկնածությունների ցուցակը համալրելու համար անցկացվող գրավոր քննության վերաբերյալ առավել մանրամասն տեղեկություններ կարելի է ստանալ www.investigative.am կայքի «Հայտարարություններ» բաժնից: