Յուրաքանչյուր` հանրային պաշտոն զբաղեցնող մարդ ունի կոնկրետ կարգավիճակ, որը պետք է պահպանվի. ՄԻՊ-ի կարծիքը՝ Վենետիկի հանձնաժողովի զեկույցի մասին

Դատարաններն արգելափակելու մասին վարչապետի կոչից հետո ես անմիջապես հայտարարությամբ հանդես եկա. այս մասին այսօր ԱԺ-ում լրագրողների հետ զրույցում ասաց ՀՀ ՄԻՊ Արման Թաթոյանը` նշելով, որ ծանոթ է Վենետիկի հանձնաժողովի եզրակացությանը։

Թաթոյանը մանրամասնեց, որ վարչապետ Նիկոլ Փաշինյանի ՝ դատարաններն արգելափակելու կոչից հետո ինքը հանդես է եկել  կոշտ և տեղին արձագանքով. «Կարծում եմ, որ իմ արձագանքը ճիշտ էր և տեղին: Իմ արձագանքը վերաբերում էր մասնավորապես այն պաշտոնյաներին, ովքեր կոչեր էին անում գնալ ու արգելափակել դատարանների մուտքերը: Սա անթույլատրելի է: Յուրաքանյուր հանրային պաշտոն զվաղեցնող մարդ ունի կոնկրետ կարգավիճակ, ինչը պետք է պահպանվի»,- պարզաբանեց նա` միաժամանակ կարևորելով  նաև դատարանների անկախության պահպանումը:

ՄԻՊ-ն իր խոսքում հավելեց նաև, որ Վենետիկի հանձնաժողովը անդրադարձել է խորհրդարանին։

Թաթոյանի համոզմամբ` իշխող խմբակցության ցանկացած ներկայացուցիչ պետք է նկատի ունենա, որ իր կողմից արած ցանկացած հայտարարություն, որն առնչվում է այդ հարցերին, միջազգային կազմակերպությունը կարող է ընկալել որպես կառավարության թաքնված  դիրքորոշում. «Դրա համար է նաև, որ ես գտնում եմ՝ այդ առումով պետք է հստակ ունենանք տարանջատում, թե իրավասության, թե կարգավիճակների առումով»,- կարծիք հայտնեց նա:

Ինչ վերաբերում է Վենետիկի հանձնաժողովի կողմից հրապարակված զեկույցին և առհասարակ տոտալ վեթինգից հրաժարվելու թեմային, ապա Թաթոյանի պնդմամբ` այդ հարցի հասցեատերը կառավարությունն է. «Ինչ էլ լինի, մենք պետք է, ցանկացած հարց մենք պետք է դիտարկենք գործող սահմանադրության և օրենքներին համապատասխան, և իրավունք չունենք թույլ տալ այնպիսի գործողություն, որը կարող է խախտել Սահմանադրությունը կամ օրենքը, որովհետև դա կարող է նաև դատական իշխանության դեպքում կարող են բացասական ազդեցություն ունենալ երկրի միջազգային վարքի վրա»,-եզրափակեց նա: