Մանուչարյանի աշխատանքը ոչ մեկը չի կարող կատարել․ Բերդի համայնքապետի կալանքը վերացնելու պահանջով՝ ավագանու անդամները նամակ են գրել դատարան

Բերդ խոշորացված համայնքի ավագանին և վարչական տարածքների ղեկավարները նամակով դիմել են Իջևանի դատարանին՝ Բերդի համայնքապետ Հարություն Մանուչարյանի կալանքի որոշումը վերանայելու և նրան ազատ արձակելու խնդրանքով։

Այդ նամակը, տարբեր ատյաններ անցնելով, կցվել է քրեական գործին, և դատավորը պետք է նաև այդ հարցը քննի։

Բերդ համայնքի Այգեձոր բնակավայրի վարչական ղեկավար Լորիս Միրզոյանը Իջևանի դատարանում, որտեղ քննվում է Հարություն Մանուչարյանի դեմ հարուցված քրեական գործից առանձնացված հատվածը՝ պաշտոնեական լիազորությունները չարաշահելու և պաշտոնեական կեղծիք կատարելու մեղադրանքով, Yerkir.am-ի հետ զրույցում վստահեցրեց, որ Մանուչարյանը  ժողովրդի կողմից սիրված, հարգված անձնավորություն է։ Նա պատահական չհամարեց, որ ընտրություների ժամանակ ինքը մենակ մնացած 3 թեկնածուներից ավելի ձայն ստացավ։

«Ես երկար տարիների աշխատանքի փորձ ունեմ և կյանքի դպրոց անցած անձնավորություն եմ, և այսօր ես ոչ միայն գնահատում եմ, որ Մանուչարյանը լավ և սիրուն տղա է, այլև գնահատում եմ Մանուչարյանի աշխատանքը։ Նրա հետ 20 տարի է աշխատում ենք՝ ժողովրդի կողմից սիրված, հարգված անձնավորություն է։ Եթե անգամ նրան ազատեն ու ՔՊ-ական պաշտոնակատար նշանակեն, ես համոզված եմ, որ Մանուչարյանի աշխատանքը ոչ մեկը չի կարող կատարել, նա պոտենցիալ հնարավորությունների տեր անձնավորություն է, եթե ուզում են Շամշադինը ծաղկեցնեն՝ պիտի խափանման միջոցը փոխվի»,-ասաց Այգեձոր վարչական շրջանի ղեկավար Լորիս Միրզոյանը։

Բերդ համանքի ավագանու անդամ Սարգիս Մարգարյանը նշեց, որ բազմաթիվ ծրագրեր կան, որոնք գյուղացին չի կարողանում ի կատար ածել, որովհետև Բերդի համայքնապետը տեղում չէ․ հողային հարցեր են, ջրի հարց է․․․ տեղակալը իր պարտականությունները շատ լավ է անում, բայց որ դիմում են, թե հողը ոնց պիտի առուվաճառք անեն, համայնքապետի ներկայությունն է պետք, ու Բերդ համայնքի աշխատանքները լրիվ կաթվածահար վիճակում են։

«Ակնկալիք չունենք դատարանից, որովհետև սա լրիվ քաղաքական հետապնդում է, չեմ հավատում, որ դատավորն ինչ-որ բան կարող է փոխել։ Որովհետև Բերդ համայնքի ղեկավարը միշտ աշխատել է արդար և լավը»,-ասաց Սարգիս Մարգարյանը։

Սահմանամերձ Չինարի բնակավայրի վարչական ղեկավար Սամվել Սաղոյանն ասաց՝ 4 տարի է համատեղ աշխատում են, և այն աշխատանքները, որ կատարել է Հարություն Մանուչարյանը, տեսանելի և շոշափելի է բնակչության կողմից։

«Բոլոր առումներով կարող եմ ասել՝ գերազանց կատարում է իր աշխատանքային պարտավորությունները։ Այսօր նրա բացակայությունը զգացվում է, քանի որ նոր տարի է սկսվել, համայնքն ունի հնգամյա ծրագիր, դա պետք է իրականացման վերջնական ավարտին հասցնել»,-ասաց նա։

Սամվել Սաղոյանը ևս անարդար է համարում, որ Հարություն Մանուչարյանին կալանքի տակ են պահում։