«Հայփոստ»-ի բաժանմունքը թալանելուց հետո 38-ամյա գողը չի կարողացել փախչել Երևանի գնդի պարեկներից. վերջիններիս օպերատիվ գործողությունների արդյունքում նա վնասազերծվել է. shamshyan.com

Ահազանգը կառավարման կենտրոնից փոխանցվել է ՀՀ ոստիկանության պարեկային ծառայության Երևանի գունդ, ինչից հետո նույն գնդի 4-րդ գումարտակի 3-րդ վաշտի պարեկները՝ գումարտակի հրամանատար Արմեն Գասպարյանի,  վաշտի հրամանատար  Սարգիս Կիրակոսյանի գլխավորությամբ,  շրջափակել են շենքի ողջ տարածքը, քանի որ  կան մի քանի մուտքեր ու  գողը կարող էր դիմել փախուստի: 

Պարեկներ  Վարդան Միրզոյանը, Սերգեյ Հարությունյանն ու Հարություն Ադամյանը, նկատելով կասկածյալին, հրահանգել են,  որպեսզի նա կանգնի, սակայն նա, մտնելով շենքի մուտքերից  մեկը, դիմել է փախուստի: Պարեկները, մոտ 500 մետր հետապնդելով նրան, կարողացել են վնասազերծել: Նրա ձեռքերը վնասված են եղել ու մինչ ոստիկանության  Շենգավիթի բաժին նրան բերման կենթարկեին, պարեկները առաջին բուժօգնությունն են ցուցաբերել, որից հետո  ժամանած բժիշկների հերթապահ խումբն է օգնություն ցուցաբերել:

Կասկածյալ Խորեն Մ.-ն հետաքննիչի որոշմամբ ձերբակալվել է: