Բլինքենն ու Չավուշօղլուն քննարկել են իրավիճակը Հայաստանում և Ադրբեջանում

Հայաստանում և Ադրբեջանում տիրող իրավիճակը չորեքշաբթի ԱՄՆ պետքարտուղար Էնթոնի Բլինքենի և Թուրքիայի արտգործնախարար Մևլութ Չավուշօղլուի քննարկած թեմաներից մեկն էր։ Այս մասին հայտարարել է ԱՄՆ Պետդեպարտամենտի մամուլի ծառայության ղեկավար Նեդ Փրայսը Ռիգայում ՆԱՏՕ-ի անդամ երկրների արտաքին հարաբերությունների գերատեսչությունների ղեկավարների հանդիպման շրջանակում կայացած հանդիպումից հետո։

Նրա գրավոր հայտարարության մեջ ասվում է, որ ամերիկյան դիվանագիտության ղեկավարը Թուրքիայի ԱԳՆ ղեկավարի հետ քննարկել է ռուս-ուկրաինական սահմանին տիրող իրավիճակը, Եթովպիայի ճգնաժամը և համատեղ ջանքերը՝ ուղղված Սևծովյան տարածաշրջանում կայունության պահպանմանը։

Երկու արտգործնախարարների միջև բանակցությունները, ըստ Փրայսի,  «հիմնված են (ԱՄՆ նախագահ Ջո) Բայդենի և Թուրքիայի նախագահ (Թայիփ) Էրդողանի միջև անցյալ ամիս Հռոմում կայացած զրույցի վրա՝ երկկողմ համագործակցության և այլ առաջնահերթությունների, այդ թվում՝ ժողովրդավարության և մարդու իրավունքների վերաբերյալ»։