ՌԴ-ն գործարկել է հակաարբանյակային համակարգը. Բլինքենը Ռուսաստանին մեղադրել է տիեզերքում «անխոհեմ» և «անպատասխանատու» պահվածքի մեջ

ԱՄՆ պետքարտուղար Էնթոնի Բլինքենը հայտարարել է, որ Ռուսաստանի կողմից հակաարբանյակային համակարգերի փորձարկումը հակասում է ռուսական կողմի դիրքորոշմանը տիեզերքում զենքի տեղադրման անթույլատրելիության վերաբերյալ։ Նրա մեկնաբանությունը հրապարակվել է Պետդեպարտամենտի կայքում․ հայտնում է Gazeta.ru-ն։

Բլինքենի խոսքով՝ նոյեմբերի 15-ի իրադարձությունները ցույց են տալիս, որ Մոսկվան «իր անխոհեմ և անպատասխանատու պահվածքով, չնայած տիեզերքում զենքի տեղակայման դեմ հայտարարություններին, պատրաստ է սպառնալիքի տակ դնել տիեզերական միջավայրի երկարաժամկետ կայունությունը և տիեզերքից օգտվելը բոլորի կողմից»։

Ինչպես ասել է ԱՄՆ ԱԳՆ ղեկավարը, «փորձարկման արդյունքում ուղեծրում հայտնվել են մեկուկես հազար տեսանելի բեկորներ», և քանի որ «դրանք դեռ երկար կմնան այնտեղ», «դա վտանգ է ներկայացնում տիեզերական օբյեկտների և արբանյակների համար»։

Նա նաև պնդում է, որ «դա զգալիորեն կբարձրացնի տիեզերագնացների և Միջազգային տիեզերակայանի, ինչպես նաև տիեզերքում մարդու այլ գործունեության ռիսկը»: