Ադրբեջանը դեսպանություն կբացի Իսրայելում

Ադրբեջանական moderator.az կայքը հայտնում է, որ Ադրբեջանի միջազգային հարաբերությունների վերլուծական կենտրոնի ղեկավար Ֆարիդ Շաֆիևն ասել է, որ օրակարգում է Իսրայելում Ադրբեջանի դեսպանատան բացման հարցը:

Շաֆիևը նշել է, որ այդ հարցը երկար ժամանակ է քննարկվում՝ ընդգծելով, որ ինքն անձամբ է աջակցում Իսրայելում դեսպանատան ստեղծմանը:

«Ադրբեջանի ղեկավարությունը քայլ առ քայլ մոտենում է այս գործընթացին: Այժմ մեր երկիրն ունի Առևտրի գրասենյակ Իսրայելում: Ընդհանրապես, սխալ է Իսրայելում Ադրբեջանի դեսպանատան ստեղծումը կապել Իրանի հետ: Մենք ունենք մեր սեփական առաջնահերթությունները: Այս հարցում կան ավելի ուժեղ տարրեր, քան Իրանը: Իսրայելի հետ մեր հարաբերություններն ավելի ամուր են»,- հավաստիացրել է նա:

Շաֆիևը նշել է, որ վերջին շրջանում օրակարգում են Իսրայելի և արաբական երկրների դիվանագիտական հարաբերությունները:

«Իսրայելի դեսպանատները բացվել են ԱՄԷ-ում, Մարոկկոյում: Բանակցություններ են ընթանում դրանք Օմանում բացելու համար: Հետևաբար, մոտ ապագայում Ադրբեջանը դեսպանություն կբացի Իսրայելում: Ժամկետը, ինչպես ասացի, կապված չէ Իրանի հետ, այն ամբողջությամբ կախված է Ադրբեջանի սեփական առաջնահերթություններից»,- ասել է նա: