Եթե այսչափ ընտրակեղծիքներ չլինեին, որակապես լրիվ այլ պատկեր էինք ունենալու. Արամ Վադևանյան

Եթե այսչափ ընտրակեղծիքներ չլինեին, կարող են ասել, որ որակապես լրիվ այլ պատկեր էին ունենալու. եթե ցուցակները լինեին պատշաճ, եթե ընտրվողների ընդհանուր թվի անձնագրերն աշխատեին։ Այս մասին ՍԴ-ում  լրագրողների հետ զրույցում նշեց Սահմանադրական դատարանում «Հայաստան» դաշինքի ներկայացուցիչ Արամ Վարդևանյանը:

«Ընտրական գործընթացի հետ կապված, երբ մենք ասում էինք, որ եղել են խախտումներ, շատերն ասում էին, որ դա, միգուցե, մեր սուբյեկտիվ գնահատկանն է կամ դեռ փաստեր չկան: Արդեն կան և դա արձանագրված է: Այլևս պետք է այդ տեսանկյունից նայենք իրավիճակին»,- ասաց Վարդևանյանը:

Նա նշեց, որ ԿԸՀ նախագահ Տիգրան Մուկուչյանի հետ հարց ու պատասխանի ընթացքում պարզվել է, թե ովքեր են ներմուծում այդ չաշխատող անձնագրերի տվյալները։

«Մասնագետները, իսկ մասնագետները առավելապես աշխատում են պետական համակարգում: Այն նույն պետական համակարգում, որի կողմից վարչական ռեսուրսի չարաշահման նման լուրջ խնդիրներ ենք արձանագրել: Հիմա ինչպե՞ս կարող ենք վստահությամբ մոտենալ նշված գործընթացին, չենք կարող: Կասկածի տակ ենք դնում և պնդում ենք այդ կասկածը»,-հայտնեց «Հայաստան» դաշինքի ներկայացուցիչը։

Վարդևանյանը հավելեց, որ իրենց կարծիքով, ընտրության արդյունքները պետք է անվավեր ճանաչել, դրանից հետո ՍԴ-ն կարող է երեք տեսակի որոշում ընդունել՝ ընտրության արդյունքների անվավերություն, երկրորդ փուլի նշանակում, մանդատների բաշխման կարգի սահմանում նոր ձևով:

«Մենք երեքն էլ պնդում ենք, բայց գտնում ենք, որ ելակետը՝ ԿԸՀ որոշումը պետք է անվավեր ճանաչվի»,- ասաց Արամ Վարդևանյանը:

Հիշեցնենք, որ Վարդևանյանը հուլիսի 10-ին ՍԴ-ում պատասխանելով արդարդատության նախարարի պաշտոնակատարի Ռուստամ Բադասյանի հարցերին, նշել էր, որ վարչապետը փաստացի ստանձնել էր նախագահի լիազորությունը:

«Խնդիրը կայանում է ոչ թե նրանում,որ պարզաքպես նախապատրաստվելու խնդիր է առաջանում, այլ այն որ վարչապետը հայտարարում է ընտրությունների օր, որովհետեւ վարչապետը ընտրությունների օր հայտարարելու լիազորություն չունի, դա հանրապետության նախագահի լիազորությունն է, սա առաջին: Երկրորդը, այո, նախապատրաստվելու տեսանկյունից, ի վերջո մեկ ուժ, եթե կարող է որոշի ընտրությունների օր, կարող է չէ որոշի, որ այդ ընտրությունները չեն լինելու, կարող է որոշի, որ ընտրությունների օրը տեղափոխելու է: Այսինքն մի քաղաքական ուժ առնվազն մարտ ամսից գիտեր, թե ինչ է լինելու հունիսի 20-ին, ու գիտեր ոնց անի, իսկ մյուսները չգիտեին»,-ասել էր նա: