Թուրքիան Ուկրաինային ասել է, որ Ղրիմի հարցն իր համար «սկզբունքային է»

Թուրքիայի արտաքին գործերի նախարար Մևլութ Չավուշօղլուն Ուկրաինայի տարածքային ամբողջականությանն աջակցելն անվանել է երկարատև և հետևողական քաղաքականություն, ինչպես նաև «սկզբունքային հարց» Անկարայի համար:

Նշվում է, որ համապատասխան հայտարարությունն արվել է նախարարների հեռախոսազրույցի ընթացքում:

Աղբյուրի հաղորդմամբ՝ Ուկրաինայի արտաքին գործերի նախարար Դմիտրի Կուլեբան առանձին շնորհակալություն է հայտնել զրուցակցին Ղրիմի պլատֆորմ նախաձեռնությանը վճռական աջակցության համար:

«Ուկրաինան երախտապարտ է Թուրքիային Ղրիմի հարցում սկզբունքներին հավատարիմ մնալու համար: Կիևը և Անկարան միավորված են իրենց ընկալման մեջ, որ Ղրիմը Ուկրաինա է, եղել է, կա և կլինի»,- շեշտել է նա:

Ապրիլին Ուկրաինայի նախագահ Վլադիմիր Զելենսկիի հետ հանդիպման ժամանակ Թուրքիայի նախագահ Ռեջեփ Թայիփ Էրդողանը հաստատեց Ղրիմի «բռնակցումը» չճանաչելու «սկզբունքային որոշումը» և աջակցեց «Ղրիմի պլատֆորմ» ստեղծելու՝ Կիևի նախաձեռնությանը: Դրանից հետո Ռուսաստանի նախագահի մամուլի քարտուղար Դմիտրի Պեսկովը հույս հայտնեց, որ Մոսկվան կկարողանա համոզել Անկարային՝ փոխել իր «լրիվ սխալ» դիրքորոշումը Ղրիմի հարցում:

Օրերս էլ Սերգեյ Լավրովը կոշտ արտահայտվեց Թուրքիայի դիրքորոշման մասին, հայտարարեց, որ իրենք Թուրքիային կհասկացնեն, որ Ղրիմի վերաբերյալ ցանկացած նմանատիպ հայտարարություն ոտնձգություն է ՌԴ–ի տարածքային ամբողջականության նկատմամբ։