Էրդողանը ինքն իրեն պետք է նշանակի ԿԲ նախագահ. Ալի Բաբաջան

Թուրքիայի էկոնոմիկայի և արտաքին գործերի նախկին նախարար, նախագահ Ռեջեփ Թայիփ Էրդողանի նախկին դաշնակից Ալի Բաբաջանը քննադատել է երկրի ղեկավարին դարձյալ Կենտրոնական բանկի նախագահ նշանակելու կապակցությամբ։

«Այսքան արագ ԿԲ նախագահներ փոխելն անկայունության աղբյուր է։ Վատ կառավարում է... Գիտեք, որ հանրապետության պատմության ընթացքում առաջին անգամ նախագահն ինքն իրեն պաշտոնի է նշանակել։ Նախագահն իրեն առաջին անգամ նշանակել է «Ունեցվածքի հիմնադրամի» նախագահ։ Իրականում նման բան կարող է անել նաև ԿԲ նախագահի պաշտոնի դեպքում։ Թող այդքան շատ չտանջվի։ Թող մի հրամանագիր ստորագրի՝ «ես՝ որպես նախագահ, ինձ նշանակում եմ ԿԲ նախագահ»»,- ըստ Cumhuriyet–ի՝ ասել է Բաբաջանը ։

Շաբաթ օրը Էրդողանը պաշտոնից հեռացրել է ԿԲ նախագահ Նաջի Աղբալին. սա վերջին 2 տարում  ԿԲ 4-րդ նախագահի փոփոխությունն է։

Հավելենք, որ Բաբաջանը հեռացել է Էրդողանի ԱԶԿ–ից 2019 թ., իսկ 2020 թ. հիմնել է սեփական` DEVA՝  «Ժողովրդավարություն և առաջընթաց» կուսակցությունը։