ՀՀ նախագահին նոր սադրանքը

Այսօր ՀՀ Նախագահ Արմեն Սարգսյան յայտարարեց, «Հանրապետութեան վարչապետին, խորհրդարանական խմբակցութիւնների ղեկավարներին եւ Հայրենիքի փրկութեան շարժման ղեկավարներին ս/թ Մարտի 13-ին ժ. 12:00-ին հրաւիրում եմ հանդիպման նախագահական նստավայրում:» Ըստ Նախագահին, այս հանդիպումին նպատակն է ներկայ իրավիճակը քննարկել եւ ճգնաժամը յաղթահարելու ուղղուած փոխընդունելի լուծումներ գտնել։

Իր վերջին դիրքորոշումներով Նախագահը այլեւս կորսնցուց իր անկողմնակալութիւնը։ Ան ապացուցեց իր երկչոտութիւնը եւ Նիկոլի ճնշումներուն ենթարկուելու բացայայտ պատրաստակամութիւնը։ Ներկայ ճգնաժամին մէջ Նախագահը սակարկեց իր սահմանադրական թէ՛ պարտականութիւնը եւ թէ՛ իրաւունքը։

Այսպիսի անմխիթար պայմաններու մէջ գտնուող հանրապետութեան Նախագահը զրկուած է բարոյական հեղինակութենէ։ Կողմերուն ուղղուած հանդիպման իր այս հրաւէրը պարզապէս անիմաստ ու դատարկ մարզանք է, որուն միակ նպատակը երկարաձգումն է վարչապետի բռնատիրութեան եւ Սահմանադրութեան ամէնօրեայ տապալումը կատարող գործունէութեան։

Նախագահը ներկայ ճգնաժամը լուծելու կարողութիւնը չունի, որովհետեւ ինք անձնապէս անբաժանելի մասը դարձած է այս ճգնաժամին։

Հետեւաբար, այս հանդիպման հրաւէրը նախագահական նոր սադրանք մըն է, որ վստահաբար թելադրուած է Նախագահի եւ վարչապետի օտար տէրերէն։

Հայրենիքի Փրկութեան Շարժումէ պէտք է մերժէ Նախագահին հրաւէրը։

Բանակցութեան, հանդիպման կամ որեւէ այլ խօսակցութեան օրակարգը ունի մէկ ու միակ նախապայման – վարչապետի եւ իր թիմակիցներու հրաժարականն ու հեռացումը հայրենի պետական կառոյցներէն եւ քաղաքական կեանքէն։

Սեդօ Պոյաճեան