Իրանը չի հանդուրժի սահմանային խախտումները. ՌԴ–ում Իրանի դեսպան

Թեհրանը ուշադրությամբ հետևում է Լեռնային Ղարաբաղում ռազմական գործողություններին և չի հանդուրժի ագրեսիան իր սահմաններին կամ տարածքներում. հայտարարել է ՌԴ–ում Իրանի դեսպան Կազեմ Ջալալին։

Իրանական լրատվամիջոցները հոկտեմբերի 20-ին հաղորդել էին, որ անօդաչու թռչող սարքը Ղարաբաղյան հակամարտության գոտուց ընկել է Իրանի սահմանային տարածք: Դրանից առաջ Իրանի արտգործնախարարությունը հայտնել էր, որ Ղարաբաղում մարտերի պատճառով ութ արկ է ընկել սահմանամերձ գյուղերի տների վրա:

«Մեր երկրի սահմանամերձ շրջաններում ակտիվությունը լրջորեն և ուշադիր վերահսկվում է Իրանի Իսլամական Հանրապետության կողմից, և այդ կապակցությամբ տարածաշրջանում հակամարտող կողմերից յուրաքանչյուրի ագրեսիան մեր երկրի տարածքում հայտարարելով անընդունելի՝ մենք լրջորեն զգուշացնում ենք նրանց անհրաժեշտ զգուշավորության մասին»,- ասել է Ջալալին:

Դեսպանը շեշտել է, որ Իրանը «սերտ ու լուրջ կապի մեջ է բոլոր կողմերի հետ»:

«Իրանի Իսլամական Հանրապետությունը ոչ մի կերպ չի հանդուրժի ագրեսիան իր սահմանների մոտ և իր տարածքում: Ադրբեջանի և Հայաստանի միջև վերջերս տեղի ունեցած իրադարձությունների ժամանակ մենք երկու կողմերին էլ ասել ենք, որ ով չպահպանի այս սկզբունքը, ամբողջությամբ կմերժվի»,- ասել է դիվանագետը: