Ադրբեջանը թույլ չի տալիս վրացահայերին պատկանող բեռները մտցնել Վրաստան

Ադրբեջանը որոշում է կայացրել թույլ չտալ, որ վրացահայերին պատկանող ապրանքները  ադրբեջանական տարածքից տեղափոխեն Վրաստան. հայտնում է Inforteka24.ru-ն՝ նշելով, որ վրացական Gzavnili բեռնափոխադրողն իր պաշտոնական կայքում հայտարարություն է տարածել այն մասին, որ Բաքվի տարանցիկ տերմինալում իրենց բեռների մի մասը առգրավվել է:

Ընկերության տվյալներով ՝ ապրանքներն առգրավվել են այն բանի համար, որ դրանք նախատեսված էին հայկական ազգանուններով անձանց կամ հայերին պատկանող ընկերությունների համար: Բացի այդ՝ փոխադրողը նշել է, որ այս օրենքն ընդունվել է սեպտեմբերի 1-ին ՝ առանց որևէ նախազգուշացման, և մեծ քանակությամբ բեռ տեղ կհասնի ուշացումով: Հայտարարության մեջ նշվում է նաև, որ ընկերությունը ստիպված է հորդորել, որ ապագայում ապրանքների և ծանրոցների վրա հայկական անուններ չգրվեն:

Պաշտոնական Բաքվի այս պահվածքը շովինիզմի և հայատյացության ծայրահեղ դրսևորում է: Ադրբեջանի իշխանությունների պահվածքն անընդունելի է նաև այն տեսանկյունից, որ խոսքն արդեն ոչ միայն Հայաստանի քաղաքացիների, այլ նաև հայկական ծագմամբ Վրաստանի քաղաքացիների իրավունքների մասին է: