Ջիհադի զինվորներին կորոնավիրուսը տարածողներ են դարձնում. ԱՊՀ հակաահաբեկչական կենտրոն

Ծայրահեղական խմբավորումների անդամներ հավաքագրողները կոչ են անում նոր տիպի կորոնավիրուսով վարակված իրենց կողմնակիցներին` տարածել այն հասարակական վայրերում. ըստ yerkir.am-ի` ՏԱՍՍ գործակալության հետ զրույցում ասել է ԱՊՀ հակաահաբեկչական կենտրոնի ղեկավար Անդրեյ Նովիկովը:

Ըստ նրա` համավարակը հեշտացրել է ջիհադականների հավաքագրումը  տնտեսական ծանրագույն վիճակում գտնվող երկրներից, սակայն, Նովիկովի, համոզմամբ, համավարակը նաև դրական կողմ ունի` փակ սահմանները. նվազել են անօրինական զենքի ու թմրանյութերի տարանցման ծավալները:

Նովիկովը պատմել է, որ ԱՊՀ բոլոր երկրների հատուկ ծառայությունները նշում են, որ համավարակի ընթացքում ահաբեկչական կազմակերպություններում «ավանդական նյութական ապահովման» հարցում դժվարություններ կան: Բացի դրանից` ահաբեկիչների գործունեությունն այլ շեշտադրում է ստացել. նրանք անցել են առցանց դաշտ, ակտիվացրել են մեդիա կենտրոնները, որոնք ահաբեկչության ու ծայրահեղականության քարոզ են անում, միաժամանակ` նոր անդամներ հավաքագրում: