ՈՒՂԻՂ. Գագիկ Ծառուկյանին կալանավորելու միջնորդության քննությունը շարունակվում է

Այսօր Երևանի ընդհանուր իրավասության դատարանի Շենգավիթի նստավայրում շարունակվում է քննվել «Բարգավաճ Հայաստան» կուսակցության ղեկավար Գագիկ Ծառուկյանին կալանավորելու հարցը։ Քիչ առաջ դատարանը եկավ ԲՀԿ առաջնորդը: Նա չզրուցեց լրագրողների հետ, պարզապես դատարանի դիմաց դրեց դիմակը և մտավ ներս:

Նկատենք, որ երեկ, երբ դատավորը հեռացել էր խորհրդակցական սենյակ և Գագիկ Ծառուկյանը դուրս էր եկել դատարանից, վերջինիս բարկացրել էր լրագրողը հարցը, թե ինչու դիմակ չի կրել: Այդ հարցից հետո Ծառուկյանը դադարել էր պատասխանել հարցերին և հեռացել էր:

Նշենք, որ Ծառուկյանի պաշտպանական թիմի անդամ Երեմ Սարգսյանը լրագրողների հետ ճեպազրույցի ընթացքում երեկ նշել էր, որ դատարանին ինքնաբացարկի միջնորդություն են ներկայացրել:

Հիշեցնենք, որ հունիսի 16-ին Ազգային ժողովը ձայների 87 կողմ, 0 դեմ հարաբերակցությամբ որոշել էր ԱԺ ԲՀԿ խմբակցության ղեկավար Գագիկ Ծառուկյանի նկատմամբ քրեական հետապնդում հարուցելու վերաբերյալ գլխավոր դատախազի միջնորդությանը տալ համաձայնություն:

Նույն օրվա մեկ այլ որոշմամբ և ձայների միևնույն հարաբերակցությամբ Ազգային ժողովը որոշում էր ընդունել Ազգային ժողովի պատգամավոր Գագիկ Ծառուկյանին ազատությունից զրկելու վերաբերյալ գլխավոր դատախազի միջնորդությանը տալ համաձայնություն:

Նշենք, որ դատական նիստն ընթանում է դռնփակ: