Չեխերը մտադիր չեն երկարացնել արտակարգ դրության ռեժիմը

Չեխիայի կառավարությունը մտադրություն չունի երկարաձգել մարտի 12-ից երկրում գործող արտակարգ դրության ռեժիմը, որի ժամկետը սպառվում է մայիսի 17-ին. այս մասին կիրակի հայտնել է երկրի վարչապետ Անդրեյ Բաբիշը, հայտնում է ՏԱՍՍ-ը։

Վարչապետը, մասնավորապես, նշել է. «Ես կարծում եմ՝ մենք չենք դիմի (ազգային խորհրդարանի ներքին պալատին) ռեժիմը երկարաձգելու մասին խնդրանքով», ու հավելել՝  մայիսի 11-ին կայանալիք կառավարության նիստի ընթացքում կքննարկվի այդ հարցը։

Նրա խոսքով՝ իշխանությունները հանրապետությունում համաճարակաբանական իրավիճակի վատթարացման դեպքում կկարողանան օպերատիվ կերպով սահմանել սոցիալական սահմանափակումներ հատուկ օրենքի հիման վրա, որը պետք է ընդունի խորհրդարանը։ Նախատեսվում է, որ այն զգալի չափով կամրապնդի առողջապահության նախարարության իրավասությունները մինչեւ ընթացիկ տարվա վերջ։