Կրթօջախների գործունեության դադարի շարունակումը բացասական ազդեցություն կունենա. ԿԳՍ նախարար

Հանրապետությունում գրիպի և սուր շնչառական վարակների առկա իրավիճակի և կանխարգելիչ միջոցառումների, ինչպես նաև հանրակրթական հաստատություններում ուսումնական բնականոն գործընթացի վերականգնման վերաբերյալ,   այսօր՝  մարտի 6-ին, Ստեփանակերտի Խաչատուր Աբովյանի անվան համար  1 հիմնական դպրոցում տեղի է ունեցել ԱՀ կրթության, գիտության և սպորտի և առողջապահության նախարությունների համատեղ խորհրդակցություն, որին մասնակցում էին Ստեփանակերտի հանրակրթական դպրոցների, մանկապարտեզների,   միջին մասնագիտական և բուհական ուսումնական հաստատությունների  տնօրեններ, կրթության ու առողջապահության ոլորտի պատասխանատուներ:

Խորհրդակցությանը, կրթության գիտության և սպորտի նախարար Նարինե Աղաբալյանը նշել է,  որ սուր շնչառական վարակների տարածումը կանխելու նպատակով հանրակրթական հաստատություններում  դասերի   ժամանակավոր դադարը  չի կարող  երկար շարունակվել,  ինչը բացասական  է  ազդեցություն է ունենալու   ուսումնական ծրագրերի ամբողջական  իրագործման ու յուրացման  վրա:  Նրա խոսքով,  վերջին ժամնակահատվածում    կրթական հաստատություններում իրականացվել են մի շարք կանխարգելիչ  և  ախտահանիչ միջոցառումներ, ընդ որում ստուգվել են  ջրիծորակներիառկայությունը, հիգիենիկ պայմանների ապահովումը, բացի այդ  կրթօջախներին տրամադրվել է ուղեցույց՝  շնչուղիների սուր  վարակներից  խուսափելու  միջոցների ծանուցմամբ:  Նախարարընաև  կարևորել է մանկավարժական անձնակազմի կողմից իրազեկման համապատասխան աշխատանքերի իրականացումը՝ ինչպես աշակերտների, այնպես էլ՝  ծնողների հետ: Ըստ Ն. Աղաբալյանի,  դպրոցական   դասաժամերը կլինեն 40 րոպե տևողությամբ, ինչը հնարավորություն կտա  ժամանակ խնայելու միջոցով  մինչև ուսումնական տարվա ավարտը ամբողջապես   իրագործել  ծրագրերի ուսուցումն ու յուրացումը: 

 «Մանկավարժները պետք է բացատրական աշխատանքներ տանեն երեխաների հետ՝ հիգիենայի կանոնների պահպանման  և կանխարգելիչ միջոցների վերաբերյալ: Աշակերտներն անպայման պետք է ապահովվեն խմելու ջրով:  Բացի այդ, պետք է ուշադրության կենտրոնում պահել և խստորեն հետևել, որպեսզի հարբուխով կամ բարձր ջերմություն ունեցող ուսուցիչներն ու աշակերտները չհաճախեն դպրոց»,- ասել է ԿԳՍ նախարարը՝ միաժամանակ  հորդորելով ծնողներին դպրոց ուղարկել երեխաներին, ովքեր արդեն  առողջ են:

Կանխարգելիչ միջոցառումների շրջանակում,  մանկապարտեզներում նաև ստուգվել է ժամկետանց  մթերքի  առկայությունը՝ որպես սնունդ   դրանց օգտագործումը բացառելու նպատակով:

Իր խոսքում,  Առողջապահության նախարար ԱրայիկԲաղրյանը հավաստիացրեց, որ համաճարակաբանական  իրավիճակը վերահսկելի է՝ կոչ անելով    ձեռնպահ մնալ ավելորդ խուճապային տրամադրություններ ստեղծելուց:

«Ստեղծված օպերատիվ շտաբի և մեր բուժհաստատությունների մասնագետները մշտապես վերահսկողության ներքո են պահում  բոլոր այն քաղաքացիներին, ովքեր ժամանում են այն երկրներից, որտեղ  կորոնավիրուսի դեպքեր են արձանագրվել:  Բուժաշխատողների մի խումբ այցելել է Երևան և ծանոթացել համապատասխան աշխատանքների իրականացման ձևերին»,-մանրամասնեց Ա. Բաղրյանը՝ հավելելով, որ Հանրապետության բուժհաստատություններն  ապահովված են անհրաժեշտ դեղորայքի ու պարագաների խմբաքանակով: Բացի այդ, Ստեփանակերտի «Մետաքսկոմբինատ» ընկերության հետ կնքվել է պայմանագիր, ըստ որի՝  արտադրվում և նախարարությանն է տրամադրվում օրական շուրջ 1000 պաշտպանիչ դիմակ: Ինչ վերաբերում է կորոնավիրուսի դեմ պայքարի  միջոցներին, ապա  առողջապահության նախարարի խոսքով, դրանք գրեթե չեն տարբերվում սեզոնային գրիպի կանխարգելիչ միջոցառումներից: 

Խորհրդակցության մասնակիցներին, կորոնավիրուսի կանխարգելման միջոցների և ախտանշանների վերաբերյալ առավել մանրամասն տեղեկություններ հաղորդեց «Համաճարակաբանության և հիգիենայի կենտրոն» ՊՈԱԿ-ի սանիտարական բժիշկ Էռնա Բաղրյանը:

Առողջապահության նախարարության  «Համաճարակաբանության և հիգիենայի կենտրոն» ՊՈԱԿ-ի գործադիր տնօրեն Օֆելյա Գրիգորյանը և ԱՆ Պետական հիգիենիկ և հակահամաճարակային տեսչության պետ Օֆելյա Հարությունյանը  ներկայացրել են սուր շնչառական վարակների կանխարգելիչ միջոցառումները: Նրանք  մանկավարժներին, տնօրեններին և կրթօջախների պատասխանատուներին հորդորել են պատշաճ ուշադրություն և օբյեկտիվ հետևողականություն ցուցաբերել՝ հանրակրթական հաստատություններում հիվանդերի ներկայության բացառման և հիգիենիկ միջոցառումների ապահովման գործընթացում:

Վան Նովիկով