Առաջընթացը ԼՂ հիմնախնդրում դրական ազդեցություն կունենա հայ-թուրքական հարաբերությունների վրա. Աբդուլլահ Գյուլ

Ղարաբաղյան հակամարտությունը Հարավային Կովկասում բարենպաստ մթնոլորտ ստեղծելու հիմնական խոչընդոտն է. МК-Турция ինտերնետային պորտալին տված հարցազրույցում ասել է Թուրքիայի նախագահ Աբդուլլահ Գյուլը:

Նա կարեւորել է Հարավային Կովկասը` որպես տարածաշրջան, որին հարեւան են ե'ւ Թուրքիան, ե'ւ Ռուսաստանը:

«Կարծում եմ` Թուրքիայի կարծիքն այդ հարցում համընկնում է Ռուսաստանի տեսակետի հետ: Առաջընթացը, որին հնարավոր է հասնել Ղարաբաղյան հակամարտության կարգավորման ճանապարհին, այդ տեսանկյունից որոշիչ նշանակություն է ունենալու: Այդ կապակցությամբ ցանկանում եմ դարձյալ ընդգծել, որ մենք պատրաստ ենք բազմակողմանի աջակցություն ցուցաբերել հիմնախնդրի լուծման որոնմանը, որին անձնական մասնակցություն ունի ՌԴ նախագահ Մեդվեդեւը: Այդ ճանապարհին ձեռք բերված առաջընթացը, անկասկած, դրական ազդեցություն կունենա թուրք-հայկական հարաբերությունների վրա: Այսպիսին է Թուրքիայի դիրքորոշումը Հայաստանի հետ հարաբերությունները բնականոնացնելու հարցում: Մենք անկեղծորեն ցանկանում ենք, որ այդ գործընթացը հաջող ավարտվի»,- ասել է Գյուլը` հավելելով, որ Հայաստան-Թուրքիա, Հայաստան-Ադրբեջան հարաբերությունները չպիտի ընկալվեն որպես առանձին գործընթացներ, այլ պետք է դիտարկվեն համատարածաշրջանային հիմքի վրա: