Իսկ ո՞վ ասաց, որ դա պարտադիր պետք է բժշկական կենտրոնում պատահած լինի. Արսեն Թորոսյանը՝ ՄԻԱՎ-ով վարակված երեխայի մասին

Այսօր ԱԺ-ում լրագրողների հետ ճեպազրույցի ընթացքում  առողջապահության նախարար Արսեն Թորոսյանն անդրադարձավ օրեր առաջ ՄԻԱՎ-ով երեխայի վարակման դեպքի առիթով հարուցված քրեական գործին:

Ըստ Yerkir.am-ի՝  նախարարը  հավելեց, որ փակագծերը կբացի քննությունը, որն այս պահին  կատարվում է: «Դրանից ավելի այս պահին չեմ կարող ասել: Ունենք պարզապես ցավալի դեպք, որ երեխայի մոտ հայտնաբերվել է ՄԻԱՎ վարակ: Նա բուժում է ստանում, փորձում ենք առողջությունը վերականգնել, որպեսզի կյանքին վտանգ չսպառնա: Մնացած մանրամասները կպարզի քննությունը»,- ասաց Արսեն Թորոսյանը:

Նա անդրադարձավ նաև հարցին, թե որտեղ կարող է վարակված լինել երեխան: «Իսկ ո՞վ ասաց որ դա պարտադիր պետք է բժշկական կենտրոնում  պատահած լինի, ինչո՞ւ եք խոսում պատասխանատվությունից՝ չիմանալով, թե ինչ դեպքով է տեղի ունեցել այդ վարակը: Միգուցե դա պատահել է կենցաղային պայմաններում: Միանգամից բժշկին  եք դատում արդեն»:

Դիտարկմանը, թե  երեխայի ծնողների մոտ վարակի առկայության հավանականությունը հերքվել է, Արսեն Թորոսյանը  դրական պատասխանեց՝ ծնողները ՄԻԱՎ  վարակակիր չեն: