Անհասկնալի կը գտնենք պատահած փողոցային արարքին պետական դատապարտման բացակայութիւնը. Հ.Յ.Դ. Հարաւային Ամերիկայի ԿԿ

Հ.Յ.Դ. Հարաւային Ամերկայի Կեդրոնական Կոմիտէն, յանուն Արժանթինի, Ուրուկուայի և Պրազիլի շարքային ընկերներուն և ընկերուհիներուն և համակիր զանգուածին, այսու կու գայ խստօրէն դատապարտելու Հ.Յ.Դ. Բիւրոյի նախկին ներկայացուցիչ և Արցախեան ազատամարտի գործօն մասնակից Հրանդ Մարգարեանի դէմ յարձակման փորձը, որ տեղի ունեցաւ երբ պտոյտի ելած էր ընտանիքի անդամներուն եւ թոռներուն հետ։ Անընդունելի է Դաշնակցական գործիչի մը դէմ եղած այս փողոցային արարքը, որուն ընթացքին փորձ եղած է մարմնային յարձակումի և աղտոտ լուտանգներ տեղացած են իր անձին և Հ. Յ. Դաշնակցութեան դէմ:

Անհասկնալի կը գտնենք պատահած փողոցային արարքին պետական դատապարտման բացակայութիւնը և հրապարակային յանձնառութիւնը՝ բացառելու նման լկտիութիւն:

Եթէ նման խուլիգանութիւն, որ արդէն առկայ է ընկերային ցանցերով տարածուած հակադաշնակցական ատելութեան արշաւով, շարունակուի հետևանքը շատ վտանգաւոր պիտի ըլլայ՝ ազգամիջեան պառակտում առաջացնելու իմաստով: Նմանատիպ մթնոլորտ անցեալին ապրած է հայութիւնը ի դէմս պոլշևիկեան հակադաշնակցական մոլուցքին և ՀՀՇական իշխանութիւններու հալածանքին:

Ներկայ իշխանութիւնները ազգային համերաշխութեան և համահայկական գործընթացի հրապարակային յանձնառութիւն վերցուցած են: Նման դէպքերու դատապարտումի բացակայութիւնը հարցականի տակ կը դնէ իրենց անկեղծութիւնը: Կը սպասենք որ նման փողոցային արարքներու կտրուկ բացառման համապատասխան քայլեր առնուին անմիջական կերպով:

Հ.Յ.Դ. Հարաւային Ամերիկայի ԿԿ