ՄԱԿ-ի ԱԽ-ն որոշում չի ընդունել Սիրիայում թուրքական գործողությունների վերաբերյալ

ՄԱԿ-ի Անվտանգության խորհուրդը նախօրեին տեղի ունեցած փակ հանդիպման ընթացքում չի կարողացել համաձայնության գալ Սիրիայի հյուսիսում Թուրքիայի ռազմական գործողությունների վերաբերյալ համատեղ հայտարարության շուրջ. հայտնում է Интерфакс-ը:

Հանդիպման ժամանակ կողմերն այնքան տարբեր դիրքորոշումներ են ներկայացրել, որ համատեղ հայտարարության հաստատումն անհնար է դարձել. ԱՄՆ-ն ու Ռուսաստանը մերժել են  հայտարարությունն ընդունելու՝ մի քանի այլ երկրների առաջարկը: Պատճառը, ըստ լրատվամիջոցների, փաստաթղթի այն մասի առկայությունն էր, որը վերաբերում է Թուրքիայի գործողությունները դատապարտելուն

ՄԱԿ-ում եվրոպական մի շարք երկրների մշտական ներկայացուցիչներ հանդես  են եկել համատեղ հայտարարությամբ՝ հորդորելով Անկարային՝ դադարեցնել գործողությունը:

ՄԱԿ-ում ԱՄՆ մշտական ներկայացուցիչ Քելլի Քրաֆթը հիշեցրել է, որ Վաշինգտոնը «ոչ մի կերպ» հավանություն չի տվել Անկարայի որոշմանը՝ իրականացնել այդ գործողությունը:

Իր հերթին, ՄԱԿ-ում Ռուսաստանի Դաշնության մշտական ներկայացուցիչ Վասիլի Նեբենզան հայտարարել է, որ Սիրիայի հյուսիսում Թուրքիայի ռազմական գործողության ընթացքում բոլոր կողմերը պետք է զսպվածություն ցուցաբերեն: