Ավստրալիայի Հայ դատի հանձնախմբի նախաձեռնությամբ` Կանբերայում անցկացվեց միջոցառում`նվիրված Հայոց ցեղասպանության զոհերի հիշաստակին

Հունիսի 5-ին առաջին անգամ Ավստրալիայի մայրաքաղաք Կանբերայում անցկացվեց Հայոց ցեղասպանության զոհերի հիշատակին նվիրված միջոցառում. տեղեկացնում է Ավստալիայի Հայ դատի հանձնախումբը:

Միջոցառմանը ներկա էր ավելի քան 50 հրավիրյալ` խորհրդարանականներ, դեսպանությունների, կառավարական գերատեսչությունների, ինչպես նաև հրեական, հունական ու հայկական կազմակերպությունների ներկայացուցիչներ։

Միջոցառման ընթացքում ելույթով հանդես եկավ Հոլոքոստի և Ցեղասպանության ուսումնասիրման ավստրալական ինստիտուտի նախագահ Պանայոտիս Դիամիդիսը, որը նշեց` հայերի, հույների և ասորիների ցեղասպանության ճանաչումը հարգանքի տուրք մատուցել է նաև ԱՆԶԱԿ-ին` ավստրալացիներին և նորզելանդացիներին, որոնք իրենց գումարը, սնունդը, հագուստը, երբեմն էլ կյանքն են զոհել ճնշվածներին փրկելու համար։

Միջոցառման ընթացքում ցուցադրվեց նաև Շահանե Բեքարյանի «Պողոս Տավրայանի վկայությունները» ֆիլմը, որը հուզեց ներկաներին:

Ավստրալիայի Հայ դատի հանձնախմբի նախագահ Հայկ Կայսերյանը, եզրափակելով միջոցառումը, իր երախտագիտությունը հայտնեց ներկաներին`հավելելով. «Միայն արդարադատությունը կարող է բուժել Հայոց ցեղասպանության թողած վերքերը»: