ԱՄՆ-Հարավային Կորեա համատեղ զորավարժությունները վերսկսելու անհրաժեշտություն չկա. Շանահան

ԱՄՆ պաշտպանության նախարարի պաշտոնակատար Պատրիկ Շանահանը հայտարարել է, որ Հարավային Կորեայի հետ անցյալ տարի կասեցված համատեղ խոշոր զորավարժությունները վերսկսելու անհրաժեշտություն դեռևս չկա: Այս մասին տեղեկացնում է Reuters լրատվական գործակալությունը:

Նշվում է, որր ԱՄՆ-ն ու Հարավային Կորեան անցյալ տարի ԱՄՆ նախագահ Դոնալդ Թրամփի և Հյուսիսային Կորեայի ղեկավար Կիմ Չեն Ընի միջև բանակցություններից հետո կասեցրել էին մի շարք համատեղ զորավարժություններ, ինչից հետո էլ, սակայն, ԱՄՆ-ի և Հյուսիսային Կորեայի միջև բանակցությունները փակուղի են մտել:

Լրատվամիջոցը հավելում է նաև, որ, Շանահանի պնդմամբ, Կորեական թերակղզում զորքերն անհրաժեշտ մարտական պատրաստություն ունեն՝ չնայած այն հանգամանքին, որ զորավարժությունները դադարեցված են: Նա միևնույն ժամանակ ասել է, որ Հարավային Կորեայում քննարկումներից հետո ինքն ասելիք կունենա. Շանահանը Հարավային Կորեայում հանդիպում կունենա իր հարավկորեացի գործընկերոջ և ԱՄՆ ԶՈւ հրամանատարի հետ:

Ըստ լրատվամիջոցի տեղեկությունների` ԱՄՆ նախագահը զարմանք էր առաջացրել ամերիկացի պաշտոնյաների մոտ, երբ Կիմ Չեն Ընի հետ առաջին գագաթնաժողովից հետո հայտարարությամբ էր հանդես եկել, որի համաձայն` Հարավային Կորեայի հետ զորավարժությունների դադարեցվել էին:

Այս տարի փետրվարին Հանոյում ԱՄՆ-ի և Հյուսիսային Կորեայի առաջնորդների երկրորդ հանդիպումը տարաձայնություննների պատճառով ձախողվել էր: