ՀՅԴ-ի համար կարևորը երկրի պետականությունն է. Հակոբ Տեր-Խաչատուրյան

Այո’, Դաշնակցության` իշխանությանն ուղղված քննադատությունները տեղ հասան, և իշխանության տարբեր ներկայացուցիչներ արդեն հայտարարություններ տարածեցին. այսօր Սարդարապատում Factor.am-ի հետ զրուցում ասաց ՀՅԴ Բյուրոյի ներկայացուցիչ Հակոբ Տեր-Խաչատուրյանը` անդրադառնալով  ՀՅ Դաշնակցության կողմից օրեր առաջ Ազատության հրապարակում հրավիրված հանրահավաքին և իշխանությանը «դեղին քարտ» ցույց տալուն:

«Պարոն Սիմոնյանը հայտարարեց, որ ինքը շատ դրական է գնահատում տեղի ունեցածը: Մենք նաև տեղյակ ենք, որ վարչապետն էլ բնական է համարում այդ ամենը, որովհետև ընդդիմադիր կուսակցություն դա է նշանակում, մանավանդ` այն կառուցողական կոչը, որ հնչեց այդ օրվա ընթացքում: Վստահ եմ, որ դուք էլ ականատես եղաք այդ ամենին, ու թեև այն գնահատվեց որպես կտրուկ և ժխտական, բայց ամբողջական կոչն այդպիսին չէր: Դրանում կար նաև դրականը` որ մենք բացառում ենք անցյալին վերադարձը, որ այս իշխանության հաջողությունը բոլորիս հաջողությունն է, որովհետև որոշ հոռի բարքեր Հայաստանից վերացնելու պատեհություն ունենք: Եվ այդ ուղղությամբ մենք պատրաստ ենք գործակցել իշխանության հետ»,- նշեց ՀՅԴ Բյուրոյի ներկայացուցիչը:

Ըստ նրա` Դաշնակցության համար իշխանությունը դեռևս չի անցել կարմիր գիծը: «Եթե անցներ, մենք արդեն, հավանաբար, կարմիր քարտով հանդես կգայինք:  Խնդիրն այն է, որ ժամանակն է լրջության` այն իմաստով, որ այս մեկ տարվա ընթացքում ժողովուրդն ուներ ավելի մեծ ակնկալիքներ: Այս պահին խնդիրը խոստումից արդեն քայլերի անցնելն է: Խոսելու ժամանակն արդեն անցել է, և իշխանության կողմից արված քայլերը պետք է լինեն ամբողջական ու ընդհանուր, այսինքն` պետք չէ, որ դրանք լինեն ընտրովի»,- ասաց Տեր-Խաչատուրյանը:

Խոսելով այն մասին, թե արդյո՞ք Հայաստանում կա ընտրովի արդարադատություն, նա կարծիք հայտնեց, որ կա: «Ռոբերտ Քոչարյանի օրինակն ամենացայտունն է: Մենք հավատում ենք և վստահ, որ մեր ժողովուրդն էլ լավ գիտի, որ սահմանադրական խախտումներ տեղի ունեցել են նաև 1996 թվականին, և այդ ժամանակաշրջանի մասին խոսք չկա: Բայց ինչո՞ւ: Այդ ժամանակ կուսակցություն է փակվել, բավականին շատ կառույցներ են գրավվել, մարդիկ են բանտարկվել քաղաքական նպատակներով, ինչպես նաև երկրի ընտրված նախագահին թույլ չեն տվել, որ նա նախագահ դառնա»,- նշեց Տեր-Խաչատուրյանը:

Ըստ նրա` օրինակ, Լևոն Տեր-Պետրոսյանի հարցը չեն ուզում հրապարակել, ինչն ընդունելի չէ կուսակցության համար: «Եթե կա անցյալն  արժևորելու ընդհանուր կեցվածք, դա անպայմանորեն չենք պահանջում այն պարզ մտահոգությամբ, որ ժամանակն է ապագային նայելու: Սա սիրո ու հանդուրժողականության վերադարձն  է: Շարունակաբար քրքրելով անցյալը` մենք ոչ մի բանի չենք հասնի: Մենք ժամանակին կարող էինք գործընթացներ սկսել, բայց, լսելով այն ժամանակվա իշխանություններին, փակեցինք շատ էջեր, քանի որ Դաշնակցության համար կարևորը երկրի պետականությունն է: Կարծում եմ` շարունակաբար անցյալին հետ նայելն  ու գրքեր քրքրելը, ատելություն սերմանելը, բաժանարար գծեր ճշտելը միայն պատուհաս է մեզ համար: Ես կողմ եմ քաղաքական գնահատականներին: Գոյություն ունեն այնպիսի երկրներ, որտեղ շատ ապօրինություններ են տեղի ունեցել, օրինակ` Հարավաֆրիկյան Հանրապետությունը, որի ապագա ղեկավարը` Նելսոն Մանդելան, երկար տարիներ բանտարկված է եղել և բանտից ազատվելուց հետո ժողովրդին միավորելու աշխատանք է տարել, թեև այնքան պատճառներ ուներ քինախնդրության: Նա իսկապես նախընտրեց սիրո ու հանդուրժողականության տարբերակը»,- ընդգծեց Տեր-Խաչատուրյանը:

Նա անդրադարձավ նաև ընտրովի դատավարության հարցին`մասնավորապես խոսելով մարտիմեկյան իրադարձությունների մասին: «Ընտրովի արդարադատություն` նշանակում է, որ առանձնացվել է մեկ օրինակ, մինչդեռ արդարադատություն հասկացությունը պետք է տարածվի բոլորի վրա: Իսկ թե այս դեպքն արդյո՞ք պիտի արժանանա քաղաքական գնահատանքի, կարծում եմ` անպայմանորեն»,- մանրամասնեց ՀՅԴ Բյուրոյի ներկայացուցիչը`մեկ անգամ ևս շեշտելով, որ անցյալի դեպքերին քաղաքական գնահատականները պետք է լինեն չափի ու տրամաբանության մեջ, լինեն սահմանադրական միջոցներով ու վերաբերեն բոլորին: