Հավատում ենք, որ հաջորդ իշխանությունը ձևավորվելու է ՀՅԴ-ի առանցքի շուրջը. ՀՅԴ Հայաստանի ԳՄ ներկայացուցիչ

Այսօր Եռաբլուրում ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանին լրագրողները մի շարք հարցեր ուղղեցին ներհայաստանյան քաղաքական կյանքի վերաբերյալ:

ԶԼՄ ներկայացուցիչների հետ զրույցում, անդրադառնալով վարչապետ Նիկոլ Փաշինյանի մեկամյա գործունեությանը, նա ասաց, որ 1 տարվա ընթացքում գրանցված տեղաշարժերը բավարար չեն, իսկ սպասումները, որ հասարակությունն ուներ իշխանություններից, չեն արդարացել, համակարգային փոփոխություններ էլ մեր երկրում տեղի չեն ունեցել:

- Նախկին իշխանավորներն ու նրանց մերձավորները պատասխանատվության կանչվեցին, դա բավարար չէ՞ր:

- Իհարկե, բավարար չէ: Մեր երկրում ժողովրդի պահանջով տեղի է ունեցել իշխանափոխություն, որպեսզի ՀՀ քաղաքացին ապրի ավելի լավ երկրում, իր հարցերը կարողանա լուծել, բայց երկրում տնտեսական բարեփոխումներ տեղի չեն ունեցել:

- Քսան տարվա ավերածն իշխանությունն ինչպե՞ս կարող է վերականգնել մեկ տարում: Վարչապետի ներկայացրած 100 փաստը բավարար չէի՞ն:

- Ինձ մոտ տպավորություն է, թե սկզբից որոշել են թիվ հրապարակել, հետո դրա տակ ինչ-ինչ փաստեր են դրել: Առաջիկայում այդ փաստերին կանդրադառնանք:

- Ռոբերտ Քոչարյանը խոսել է միասնական ու հզոր ընդդիմություն ձևավորելու մասին: Մամուլն էլ գրեց, որ ՀՅԴ-ն պատրաստվում է վարչապետին անվստահություն հայտնելու գործընթաց սկսել: Հնարավո՞ր է, որ Քոչարյանի հետ ընդդիմություն ձևավորեք:

-Ե՛վ անվստահություն հայտնելու, և՛ ընդդիմություն ձևավորելու մասին որևէ քննարկում մենք որևէ մեկի հետ չենք ունեցել: Մեր օրակարգի, հարցերի շուրջ պատրաստ ենք բանակցել բոլորի հետ: Բանակցում ենք օրակարգի ու հարցերի շուրջ, այլ ոչ թե` անձերի, ու մեր առջև խնդիր չենք դրել` համագործակցել Ռոբերտ Քոչարյանի կամ մեկ ուրիշի հետ:

- Այս պահին ո՞րն է օրակարգային թիվ մեկ հարցը:

- Մեր առջև խնդիր չենք դրել ու հատուկ ջանք չենք գործադրում, որպեսզի իշխանությունը ձախողի: Բազմիցս հայտարարել ենք, որ իշխանության ձախողումը երկրի ձախողումն է: Բայց իբրև արտախորհրդարանական ընդդիմություն` քննադատելու ենք իշխանության սխալ գործողությունները, քննադատելու ենք փաստարկված, հիմնավորված, առանց հայհոյանքների: Մեր խոսքի կշիռը գիտենք ու այս ընթացքում էլ ապացուցել ենք:

-Ո՞րն է իշխանության ամենամեծ բացթողումը:

- Ամենամեծ բացթողումն այն է, որ իշխանությունը բացառիկ շանս ու հնարավորություն ուներ հասարակությանը համախմբելու, ու երկիրն առաջ տանելու: Ցավոք, տեսանք, որ երկիրը բաժանվեց սևերի ու սպիտակների, հեղափոխականների ու հակահեղափոխականների: Մի ընթացք, որ մեր երկիրն ավելի է պառակտում, քան համախմբում: Երբ վարչապետն ընդդիմադիր գործիչ էր, նա «դուխով» գնում էր ոստիկանություն, նախարարի ու դատախազի վրա մատ էր թափ տալիս, որովհետև ինքը համարձակ քաղաքական գործիչ էր, ու, իբրև ընդդիմադիր, դա հասկանալի էր: Բայց արդեն որպես վարչապետ նրա ելույթները` «կծեփեմ պատին», «բռունցքիս հարվածը կզգաք ձեր ծնոտին», մեզ համար անընդունելի են, որովհետև շատ լավ հասկանում ենք` հա՛մ նալն է իրենց ձեռքին, հա՛մ` մեխը: Բայց թե մինչև երբ այս ճանապարհով մեր երկիրը կառաջնորդվի, չգիտենք:

 - Այսինքն` երկիրը համախմբված չէր նախկինում ու համախմբված չէ ա՞յժմ:

- Այո, ո՞վ է ասել, թե նախկինում համախմբված էր: Ընդհանրապես` սխալ է անընդհատ այդ համեմատությունը տանել, թե` բա այն ժամանակ այսպես, այնպես: Եթե նախկին իշխանությունը լավը լիներ, հիմա իշխանության կլիներ:

-Ինչքանո՞վ եք իրատեսական համարում Արցախը բանակցությունների սեղանի շուրջը վերադարձնելը:

-Իշխանությունների այն մի քանի հայտարարությունները, թե չի կարող քննարկվել «Խաղաղություն` տարածքների դիմաց» թեզը, կամ ԱԱԾ պետի հայտարարությունը մենք անմիջապես ողջունել ենք, իսկ այս վերջին հայտարարության մասով, որ` թող ժողովուրդը որոշի, մտահոգություն ունենք և բարձրաձայնել ենք: Ժողովուրդն արդեն որոշել է, Եռաբլուրի տղաներն այդ հարցը որոշել են, ազատագրել են տարածքները, իսկ իշխանությունների խնդիրը դա պահպանելն է: Ողջունելի է, որ իշխանությունները ցանկանում են Արցախը վերադարձնել բանակցային գործընթաց, բայց փաստ է, որ Արցախը մինչ այս պահը վերադարձված չէ:

- Վերջին շրջանում նշվում է, որ բանակին հատկացված միջոցներն աննախադեպ աճել են, դա ձեզ համար ձեռքբերո՞ւմ չէ:

- Հակառակ բաներն են նշում: Դրա մասին շատ ինֆորմացիա չունեմ: Մեկնաբանեմ: Տեսեք` ակնկալիքները շատ ավելի մեծ են, ու իշխանությունները պարտավոր են կատարել այն բոլոր խոսոտումները, որ տվել են: Հասկանալի է, որ դա մեկ տարվա ընթացքում հնարավոր չէ իրականացնել, բայց տեմպերը չեն բավարարում: Անհասկանալի է իշխանության տեսլականը` երկրում քաղաքական ինչ բարեփոխումներ են եղել և այլն:

-Միայն քննադատելո՞վ եք բավարարվելու, թե՞ հստակ քայլեր էլ կլինեն:

-Նախորդ երկու ամիսների ընթացքում հստակ գնահատական ենք տվել կառավարության գործունեությանը, 32 էջանոց փաստաթուղթ ենք ներկայացրել, որում ներկայացրել ենք մեր դիտողություններն ու առաջարկները, կառավարության կառուցվածքի մասին շատ հստակ ներկայացրել ենք  մեր պատկերացումները: Որպես արտախորհրդարանական ընդդիմադիր ուժ` օրենքով սահմանված ու մեր լիազորությունների շրջանակում բոլոր գործողություններն իրականացնելու ենք:

-Այսինքն` բողոքի երթեր, ճանապարհներ փակել...

-Ինչու` ոչ, օրինակ` համահարթեցման դեմ մեր երիտասարդները պայքարի շարք են սկսել, առաջին գործողությունն արել են ԱԺ բակում, առաջիկայում շարունակությունն էլ կտեսնենք: Բայց կրկնում եմ` մեր հիմնական նպատակն ու գերխնդիրը իշխանությունը տապալելը կամ ձախողման մղելը չէ: Ընդհակառակը` մենք մեր առաջարկություններով, քննադատություններով զգաստության կոչն անում ենք, որ կառավարությունն  ավելի լավ աշխատի: Ամեն տեղ հակահեղափոխականություն ու դավադրություն պետք չէ գտնել:

-Հավատո՞ւմ եք, որ հաջորդ իշխանությունը ձևավորվելու է ՀՅԴ-ի առանցքի շուրջը:

-Իհարկե, հավատում եմ, ու այդպես է լինելու: Մեր հիմնական նպատակն է, մեր առջև խնդիր ենք դրել, որ հաջորդ խորհրդարանական ընտրություններից հետո իշխանությունը պետք է ձևավորվի Դաշնակցության առանցքի շուրջը:

-Փաշինյանի վարկանիշն ընկե՞լ է:

-Ես չափման միավոր չունեմ, ես տեսնում եմ հասարակության տրամադրություններն ու օբյեկտիվ դժգոհությունները: