Արցախի Նորշենի թիմը AESA-ի ամենամյա գիտական օլիմպիադայում արժանացել է մրցանակի

Արցախի Հանրապետության Նորշենի դպրոցի թիմը, մասնակցել է մարտի 17-ին ԱՄՆ Լոս Անջելես քաղաքում կայացած Ամերիկայի հայ ճարտարագետների ու գիտնականների միավորման՝ AESA-ի (Armenian Engineers and Scientists of America) կողմից կազմակերպված ամենամյա 18-րդ գիտական օլիմպիադային:

Թիմը, որի կազմում էին  Նորշենի դպրոցի 12-րդ դասարանի աշակերտուհի Աննա Հարությունյանը և Աշանի դպրոցի 11-րդ դասարանի աշակերտ Գեղամ Ղայամյանը,  զբաղեցրել է մրցանակային երրորդ տեղը և արժանացել հատուկ մրցանակի: Նրանք ֆիզիկայի բնագավառում տեսակապի միջոցով ներկայացրել են էլեկտրաստատիկական ու դասավանդման մեթոդիկայի ոլորտի իրենց մտահղացումը: Աշխատանքները ղեկավարել է Նորշենի ֆիզիկայի ուսուցիչ Արա Հարությունյանը, ով մեզ հետ զրույցում կարևորել է այն հանգամանքը, որ Արցախի աշակերտներն, առաջին անգամ մասնակցելով այդ հռչակավոր օլիմպիադային, մրցանակային պարգևի են արժանացել:

Ամերիկայի հայ ճարտարագետների ու գիտնականների (AESA) կազմակերպությունը անկուսակցական եւ ոչ աղանդավորական բարեգործական կազմակերպություն է, որի նպատակը աշխարհի տարբեր երկրներում ապրող հայերի մասնագիտական, տեխնիկական եւ գիտական հնարավորությունները զարգացնելն է:

Այն հիմնադրվել է 1983 թվականին, երբ տարբեր ոլորտների շուրջ 40 հայ գիտնականներ, պրոֆեսորներ ու ճարտարագետներ արձագանգեցին դոկտոր Հակոբ Փանոսյանի առաջարկին: Այսօր Հայ ճարտարագետների եւ գիտնականների միության անդամների ու համախոհների թիվը մի քանի հազար է, նրանց գործունեության ոլորտներն ու նպատակները՝ բազմազան: Միավորումը նպատակ է դրել ընդլայնել իր դերը Հայաստանի Հանրապետությունում եւ Լեռնային Ղարաբաղի Հանրապետությունում` գիտության, տեխնիկայի, ճարտարագիտության եւ մաթեմատիկայի զարգացման բնագավառում:

AESA-ի տարեկան գիտական օլիմպիադան 6-12-րդ դասարանների ուսանողների համար է՝ կենսաբանության, քիմիայի, ֆիզիկայի, ռոբոտաշինության եւ արհեստական ինտելեկտի ոլորտներում: Այս տարի օլիմպիադային առաջին անգամ մասնակցում էին դպրոցականներ Արցախից, Հայաստանից ու Նյու Յորքից: