Google-ը թողարկել է արհեստական ինտելեկտի հիմքով առաջին դուդլը

Google ընկերությունն այսօր հաճելի անակնկալ է մատուցել երաժշտասերներին: Որոնման համակարգի մեկնարկային էջին տեղադրվել է ինտերակտիվ դուդլ՝ նվիրված կոմպոզիտոր Յոհան Սեբաստիան Բախի ծննդյան տարեդարձին: Դա արհեստական ինտելեկտի հիմքի վրա ստեղծված առաջին դուդլն է:

«Դուդլն օգտատերերին հնարավորություն կտա իրենց կոմպոզիտոր զգալու և մեղեդի ստեղծելու մեքենայական ուսուցման տեխնոլոգիայի միջոցով: Արհեստական ինտելեկտը մեկ հպումով նոտաների հավաքածուն կվերածի իսկական ստեղծագործության՝ Բախի երաժշտական ոճով»,- նշված է ընկերության հաղորդագրության մեջ:

Օգտատերերը երաժշտական ստեղծագործություններ կկարողանան ստեղծել և այն համացանցում տարածել ընդամենը երկու օր: