Օպերայի մերձակա տարածքներում ապամոնտաժման աշխատանքները դադարեցվել են.քաղաքապետարանում քննարկում է հրավիրվել

Օպերայի հարակից տարածներում կառուցված սրճարանների ապամոնտաժման աշխատանքները դադարեցվել են: Երևանի Կենտրոն վարչական շրջանի ղեկավար Վիկտոր Մնացականյանը համաձայնել է բանակցել Օպերայի տարածք եկած ԲՀԿ–ական պատգամավորներ Նաիրա Զոհրաբյանի ու Արման Աբովյանի հետ՝ ստեղծված իրավիճակում ընդունելի լուծումներ գտնելու նպատակով։

Հավելենք, որ այս պահին ոստիկանություն բերման է ենթարկվել 16 քաղաքացի:

Օպերայի հարակից տարածքից  բերման ենթարկված անձանց հետ կապված՝ Մարդու իրավունքների պաշտպանի ներկայացուցիչները գտնվում են ոստիկանությունում: Ստացվել են ահազանգեր Պաշտպանի աշխատակազմ, հայտնում են ՄԻՊ գրասենյակից:

Այցը կապված է ազատությունից զրկված վիճակում գտնվող անձանց իրավունքների երաշխավորման հետ:

Հիշեցնենք, որ վաղ առավոտից Օպերայի հարակից տարածքի սրճարանների աշխատակիցները ցույց էին կազմակերպել`բողոքելով ապամոնտաժման դեմ: