Անսպասելի ապամոնտաժումներ չեն լինի. Սրճարանատերերի քննարկումը քաղաքապետարանում ավարտվեց

Այսօր Երևանի քաղաքապետարանը մեկնարկել էր Օպերայի հարակից տարածքի  սրճարանների ապամոնտաժումը: Այս գործընթացին դեմ են սրճարանի տերերը: Քիչ առաջ սրճարանատերերը հանդիպում-քննարկում են անցկացրել քաղաքապետարանի ավագանու անդամների հետ` քննարկելու ստեղծված վիճակը:

Հանդիպումից հետո սրճարանատերերը լրագրողների հետ զրույցում ասացին, որ որոշվել է հրաժարվել պատահական, անսպասելի ապամոնտաժման գործելաոճից: Սրճարանատերերը խնդրել են աշխատել գոնե այս սեզոնին, այսինքն գոնե ևս մեկ տարի: Առաջարկվել է տաս տարի պայմանագրերը կրճատել գոնե հինգ տարով, ինչը պետք է քննարկվի քաղաքապետի հետ:

 Կենտրոն վարչական շրջանի ղեկավար Վիկտոր Մնացականյանը լրագրողների հետ զրույցում ասաց, որ դեռևս ընդհանուր հայտարարի չեն եկել:

Սրճարանատերերը նաև կարծում էին, որ ապամոնտաժելիս բոլոր սրճարանները թող ապամոնտաժվեն, ինչին քաղաքապետարանի ավագանու անդամները պատասխանել են, որ որոշ սրճարաններ կշարունակեն աշխատել, դրանք են` «Ռիչ», «Ջազզվե», «Ատլանտիկ», «Շոկոլադնիցա»: 

Նշենք, որ քաղաքապետարանը հրատապ ու առաջնային է համարում վերականգնել Օպերայի հարակից տարածքի կանաչապատ և ճարտարապետական տեսքը, որի արդյունքում պետք է ապամունտաժվեն որոշ սրճարաններ: