Զենքը վայր չեն դնելու ու չեն հանձվելու. ՊՊԾ-ում ասուլիսն ավարտվեց

Այսօր լրագրողներին հնարավորություն տրվեց մտնել ՊՊԾ տարածք, և հարցեր ուղղել  զինված խմբավորման անդամներին: Հիմնադիր խորհրդարանի անդամ Վարուժան Ավետիսյանը նշեց, որ զենքը վայր չեն դնելու ու չեն հանձնվելու: Հայտարարեց, թե մշտապես զգոն են, և գիտեն, թե ինչպես են կազմակերպելու իրենց պաշտպանությունը, եթե գրոհ լինի. ոչ նեղված են, ոչ էլ` ընկճված:

Վարուժան Ավետիսյանը, պատասխանելով այն հարցին, թե ինչպես է եղել ոստիկանության կողմից գրոհը իրենց դեմ, նշեց, որ  մեկ գրոհ է եղել, կրակելով եկել են շենքի ուղղությամբ, որից հետո հակահարված են ստացել ու հեռացել:

 Վարուժան Ավետիսյանը ներկայացրեց պահանջները, այն է` Սերժ Սարգսյանի  հրաժարական, անցումային կառավարության ձևավորում, արտահերթ ընտրություններ, իսկ այդ ընթացքում` նոր Սահմանադրության ընդունում:

Ինչ վերաբերում է ցուցարարներին և հարթակում ելույթ ունեցողներին, Վարուժան Ավետիսյանի խոսքով` դրանք պետք է լինեն մաքուր կենսագրությամբ անհատներ, որոնք չունեն լիդերության հասնելու նկրտումներ, կամ նեղ կուսակցական շահեր հետապնդելու նկրտումներ:

«Եթե լիդերության հարց լիներ, ապա մենք էլ կարող էինք լինել այդ լիդերը, որովհետև մենք ենք հարուցել պրոցեսը,  բայց մենք նման նկրտումներ  չունենք, մենք  հենվում ենք ժողովրդի պայքարի ու իմաստության վրա: Եթե Նիկոլ Փաշինյանը ուզում է նեխած համակարգում դառնալ նախագահ, դա կործանման ճանապարհ է, մենք ժամանակ չունենք»,- ասաց նա:

Նշվեց, որ զինված խումբը ՊՊԾ գնդում կմնա այնքան, մինչև իշխանությունները կատարեն իրենց պահանջները: