Դեսպան Վարուժան Ներսեսյանը հանդիպել է կոնգրեսական Դեյվիդ Փրայսի հետ

Մարտի 7-ին դեսպան Վարուժան Ներսեսյանը հանդիպեց Կոնգրեսում գործող House Democracy Partnership երկկուսակցական հանձնաժողովի նախագահ, Կոնգրեսական Դեյվիդ Փրայսին: Այս մասին տեղեկացնում են ՀՀ ԱԳՆ-ից:

Հանդիպմանը զրուցակիցները քննարկեցին հանձնաժողովի և ՀՀ Ազգային ժողովի միջև համագործակցության հաստատման գործընթացին վերաբերող հարցեր:

Դեսպան Ներսեսյանը կոնգրեսականին ներկայացրեց նաև ժողովրդավարության ամրապնդմանն ուղղված՝ ՀՀ կառավարության կողմից իրականացվող քայլերը, ինչպես նաև խորհրդարանական ընտրությունների վերաբերյալ միջազգային դիտորդների ու կազմակերպությունների դրական արձագանքները:

Վարուժան Ներսեսյանը և Դեյվիդ Փրայսն անդրադարձան հայ-ամերիկյան հարաբերությունների օրակարգի մի շարք հարցերի՝ այդ համատեքստում կարևորելով ԱՄՆ կոնգրեսի դերակատարումը դրանց կյանքի կոչման գործում: