Վարդենիսը մի քանի օրում մի քանի քաղաքապետ ունեցավ. «Ժամանակ»

«Ժամանակ» թերթը գրում է. «Գեղարքունիքի մարզի Վարդենիս քաղաքի նախկին քաղա­քապետի՝ երկրից հեռանալուց հետո քաղաքը մնացել է առանց ղեկավարի: Սակայն զավեշտն այն չէ, որ քաղաքապետը փա­խել է քաղաքից, այլ այն, որ մի քանի օրվա ընթացքում մի քանի ժամանակավոր պաշտոնակատարներ են նշանակվում:

«Ժամանակ»-ի տեղեկություններով՝ մոտ մեկ շաբաթ առաջ Վարդենիսի քաղաքապետի ժամանակավոր պաշտոնակատար էր նշանակվել Սասուն Միքայելյանի մտերիմը, ով նույնիսկ հասցրել էր քեֆ-ուրախություն կազմակերպել այդ առիթով:

Սակայն երեք օր հետո անհասկանալի պատճառներով նրան հեռացրել են ու օրեր հետո ժամանակավոր պաշտոնակատար նշանակել մարզպետի ընկեր Արամ Մելքոնյանին:

Վերջինս Ռուսաստանի Դաշնությունում է մշտապես ապրել: Սակայն երկրորդ ժամա­նակավոր պաշտոնակատարին եւս հեռացրել են, քանի որ նշանակումից հետո պարզվել է, որ վերջինս ոչ թե Վարդենիսի գրանցում ունի, այլ գյուղերից մեկի: Երեկ հայտնի դարձավ, որ նույն մարդուն կրկին նշանակել են քաղաքապետի ժամանակավոր պաշտոնակատար եւ ներկայացրել քաղաքապետարանի աշխատակազմին»:

Մանրամասները` թերթի այսօրվա համարում: