Սահմանվել են քաղաքական ուժերին Հանրային հեռուստատեսությամբ, ռադիոյով եթերաժամ տրամադրելու կարգը և ժամանակացույցը

ՀՀ  կենտրոնական ընտրական հանձնաժողովի արտահերթ նիստում սահմանվել է 2018 թվականի դեկտեմբերի 9-ին կայանալիք Ազգային ժողովի արտահերթ ընտրություններին մասնակցող քաղաքական ուժերին հանրային հեռուստատեսությամբ և հանրային ռադիոյով եթերաժամ տրամադրելու կարգը և ժամանակացույցը:

ԱԺ արտահերթ ընտրություններին մասնակցող կուսակցություններին և կուսակցության դաշինքներին նախընտրական քարոզչություն իրականացնելու նպատակով հանրային հեռուստատեսությամբ եթերաժամ կտրամադրվի ժամը 19:30-ին, իսկ հանրային ռադիոյով՝ յուրաքանչյուր օր 2 անգամ,  ժամը 13:30-ից և ժամը 21:15-ից: 

Արտահերթ ընտրություններին մասնակցող կուսակցության նախընտրական քարոզչություն իրականացնելու նպատակով հանրային հեռուստատեսությամբ տրամադրվելու է 30 րոպե անվճար և մինչև 60 րոպե վճարովի եթերաժամանակ: 

Քարոզչության համար նախատեսված է 12 օր ժամանակ` նոյեմբերի 26-ից մինչև  դեկտեմբերի 7-ը ներառյալ: Հանրային հեռուստատեսության 30 րոպե անվճար և մինչև  60 րոպե վճարովի հիմունքներով եթերաժամն առաջարկվում է  տրամադրել հետևյալ տարբերակով. նոյեմբերի 26-ից մինչև դեկտեմբերի  1-ը ներառյալ օրը երկու րոպե անվճար և մինչև 5 րոպե վճարովի հիմունքներով: 

Հաջորդ 6 օրը`  դեկտեմբերի 2-ից մինչև դեկտեմբերի 7-ը ներառյալ, օրը 3 րոպե անվճար և մինչև 5 րոպե վճարովի հիմունքներով:

Հանրային ռադիոյի պարագայում տրամադրվելու է 60 րոպե անվճար և մինչև 90 րոպե վճարովի հիմունքներով եթերաժամանակ: