Եթե խնդիրը չլուծվի, երկուշաբթի կաթերով գալու ենք կառավարության մոտ. գյուղացիները դժգոհ են կաթի մթերման գներից

Կառավարության շենքի մոտ բողոքի ակցիա են իրականացնում գյուղացիները, ովքեր դժգոհում են կաթի մթերման գներից: Դժգոհությունների առիթ  է տվել այն հանգամանքը, որ կաթ մթերող ընկերությունները 60-70 դրամով իջեցրել են կաթի մթերման գները:

Կոտայքի մարզի Գեղաշեն գյուղից Արմեն Բագրատյանը Yerkir.am-ի հետ զրույցում նշեց, որ այդ խնդրով դիմել են տարբեր մարմինների, գյուղատնտեսության նախարարություն, կառավարություն: «Ամեն օր ասում են` ընթացքի մեջ է, հարցին լուծում կտանք, բայց բան չի փոխվում: Մենք էլ օր օրի գումար ենք կորցնում, անասնակեր պետք է առնենք, այլ բաներ»,- ասաց նա:  

Անդրադառնալով առաջին փոխվարչապետ Արարատ Միրզոյանի` կաթ մթերողների հետ հանդիպմանը` Բագրատյանն ասաց, որ հանդիպումից հետո խոսք էին տվել, որ գները պետք է նույնը մնան, բայց էլի իջեցրեցին: «Դրանից հետո 20 դրամ նորից իջեցրել են, նորից խոսակցություն կա` իջեցնելու, բայց եթե չիջեցնեն էլ, այս գները մնան, մեզ ձեռնտու չէ, մենք չենք կարողանում այս գներով»,- ասաց նա:

Մեր զրուցակիցը շեշտեց, որ հիմա իրենք 120-130 դրամով կաթ են հանձնում: «Մայիսի 10-ից դիմումներ ենք ներկայացրել խնդրի մասին: Նոր մեզ հետ հանդիպեց կառավարության աշխատակազմի ղեկավարը, ով մեզ ուղարկեց գյուղնախարարություն: Այնտեղ Ղազարյան Գևորգին ենք տեսել, ով մեզ ասաց, որ վաղը կաթ մթերողներին կկանչեն` այդ հարցին լուծում գտնելու համար»,- ասաց նա, ապա հավելեց, որ ամեն անգամ այսպես է լինում:

«Մենք եկել ենք այստեղ` կոնկրետ իրենց ասելու, որ` եթե մինչև երկուշաբթի օրը դուք չկարողանաք այս հարցին լուծում տալ, կաթի մթերման գները չբարձրանան, երկուշաբթի օրը ՀՀ-ի բոլոր  կաթ արտադրողներով, կաթերով հանդերձ, գալու ենք այստեղ/կառավարության մոտ/: Ավելի լավ է ժողովրդին  ձրի տանք այդ կաթը, քան օլիգարխ կաթ մթերող ընկերություններին»,- ասաց Բագրատյանը:  

Գեղարքունիքի մարզի Նորատուս գյուղից Խաչիկ Ստեփանյանն էլ նշեց, որ ինքը գյուղից մոտ 1.5 տոննա կաթ է հանձնում «Անի»  ընկերության մթերման կետին և չի կարողանում այդ գների պայմաններում կաթ վերցնել հարևաններից, որ ինքն էլ օգուտ ունենա: «Գներն իջել են անցած ամսվա 1-ից, կաթի գինը էժանացրել են 20 դրամով, դրանից հետո ամեն տասը օրը մեկ 10-ական դրամ էժանացրել են մինչև այս ամսի 10-ը` գործարանի գինը 200 հարյուր դրամից հասցնելով 140 դրամի: Էդ ի՞նչ եղավ, որ կաթը միանգամից 60 դրամ էժանացավ»,- ասաց նա և հարց հնչեցրեց` որ գործարանները կաթն էժանացրել են, կաթնամթերքը խանութում ինչո՞ւ չի էժանացել, ընդհակառակը` դեռ մի բան էլ թանկացել է:

«Ուզում ենք, որ այս իշխանությունները ժողովրդի կողքին կանգնեն, կաթի գործարաններին ասեն` կաթի գնի բալանսը պահեն, էս ի՞նչ ա էս ժողովրդի վիճակը»,- ասաց մեր զրուցակիցը:

Կառավարության և գյուղատնտեսության նախարար Արթուր Խաչատրյանի պարզաբանումները հարցի վերաբերյալ կներկայացնենք ավելի ուշ: