ԱԺ-ում կրքերը բորբոքվեցին. Աշոտյանն ու Մանուկյանը նիստերի դահլիճում վիճեցին

Խորհրդարանում կառավարության ծրագրի քննարկման ժամանակ կրքերը թեժացան:

ԱԺ նախագահ Արա Բաբլոյանն առաջարկեց նիստը շարունակել այնքան մինչև օրակարգը սպառվի: Առաջարկն ընդունվեց ձայների` 63 կողմ և 0 դեմ հարաբերակցությամբ:

ՀՀԿ-ական պատգամավոր Սամվել Ֆարմանյանը ելույթ ունեցավ և դիմեց ԱԺ փոխնախագահ, «Ծառուկյան» խմբակցության պատգամավոր Միքայել Մելքումյանին` ասելով. «Այսուհետ Դուք անձամբ նախագահ Սարգսյանի մասին խոսելիս չօգտագործեք «քաղաքական բռնապետ» արտահայտությունը»:

Մելքումյանն էլ նրան հորդորեց զսպել հակադարձելու մոլուցքը և բոլոր արտահայտություններն ընկալել քաղաքական հարթությունում: «Հավուր պատշաճի ընկալեք իրականությունը»,- ասաց նա:

Աշոտյանն էլ հակադարձեց. «Երբ բնակվում ես ապակե տնակի մեջ, չարժե քարեր նետել»:

«Ծառուկյան» խմբակցության պատգամավոր Արթուր Մանուկյանը Արմեն Աշոտյանին արձագանքեց. «Էշ-էշ դուրս մի՛ տուր»:

Աշոտյանն ու «Ծառուկյան» խմբակցության պատգամավոր Արթուր Մանուկյանը վեճի բռնվեցին: ՀՀԿ-ական պատգամավորները բորբոքված Արմեն Աշոտյանին դուրս հանեցին դահլիճից, որ վեճը դադարի: Քիչ անց նա վերադարձավ դահլիճ:

Արա Բաբլոյանը հորդորեց կոռեկտության սահմաններում լինել: