Դուք նման քաղաքապետ չեք էլ գտնելու, նենց մի արեք, որ մարդը ներվերից կտրվի. Սամվել Բալասանյան

Հետաքրքիր իրադարձություններ են զարգացել Գյումրիի քաղաքապետարանում: Գյումրիի ավագանու «Բալասանյան» դաշինքի 10 անդամներ անվստահություն են հայտնել քաղաքապետ Սամվել Բալասանյանին: Նրանց է միացել նաև ավագանու ԲՀԿ խմբակցությունից` 2 և ՕԵԿ-ից` մեկ անդամ:

Այժմ «Բալասանյան» դաշինքի թեկնածուն Տիգրան Հովհաննիսյանն է, ով Քրիստոնեա-դեմոկրատական կուսակցության անդամ է:

Ուշագրավ էր թեկնածուի ելույթը: Նա նշեց, որ թիմային քննարկումների արդյունքում որոշեցին քաղաքապետին անվստահություն հայտնել: «Ուզում եմ անդրադառնալ ինձ վարկաբեկելու փորձ անողներին. կարող եմ ասել, որ իմ փոխարեն կարող էր լինել մեր թիմից ցանկացած մեկը: Ես բոլոր գործընկերներին, անկախ կուսակցության պատկանելությունից, կոռեկտության կոչ եմ անում: Որպես «Բալասանյան» դաշինքի անդամ` վստահ եմ, որ ճիշտ քայլ եմ կատարել»,- ասաց Հովհաննիսյանը:

Նա շեշտեց, որ կողմ է, որպեսզի Սամվել Բալասանյանը շարունակի ղեկավարել Գյումրին, նաև նշեց, որ չի պատասխանի ավագանու անդամների հարցերին, և որ դա իր իրավունքն է:  

Չնայած հայտարարությանը, որ չի պատասխանի հարցերի, ավագանու անդամները հարցեր ուղղեցին նրան: Գրեթե բոլոր ելույթ ունեցողները նշում էին, որ Բալասանյանի հորդորով են անվստահություն հայտնում նրան: Ավագանու անդամները գրեթե միակարծիք էին, որ որոշել են մեկ տարով ապահովագրել Սամվել Բալասանյանին, որովհետև ՏԻՄ օրենքով նախատեսված է, որ եթե մեկ անգամ անվստահություն ես հայտնում և մերժվում, ապա մեկ տարի այլևս չես կարող դա անել:  

Հիշեցնենք, որ Գյումրու ավագանին ունի 33 անդամ, որոնցից 17–ը` «Բալասանյան» դաշինքից, ներառյալ` քաղաքապետը, 8–ը ներկայացնում են ԲՀԿ–ն, 4–ը` ՕԵԿ-ը, 4–ը «Գալա»–ի ներկայացուցիչներ են։ Ըստ օրենքի` եթե ավագանու 1/3–րդը դեմ է քվեարկում, ապա քաղաքապետը հրաժարական է տալիս։

Ավագանու անդամների մեղադրանքներից հետո ելույթ ունեցավ քաղաքապետ Բալասանյանը: Նա նշեց, որ եթե չունի հանրային աջակցություն, ուրեմն իրավունք չունի աշխատելու: Բալասանյանը հայտարարեց, որ կառչած չէ քաղաքապետի պաշտոնից: «2012 թվին ինձ ուղղորդեցին, որ պետք է լինեմ Գյումրիի քաղաքապետ: Չի եղել դեպք, որ գումար բաժանեմ, ձայն գնեմ: Ես իմ ամբողջ կյանքում լավություն եմ արել իմ ընտրողին, արել եմ, անելու եմ ամեն ինչ, և կապ չունի` քաղաքապետ եմ, թե` ոչ»,- ասաց նա:

Բալասանյանը նշեց, որ հրաժարական չի կարող տալ, նման օրենք չկա: «Մենք ունենք 68-րդ հոդվածը, և միակ ճանապարհը, որ կա, մեր վստահության քվեն ամրագրելն է, և մենք գնացինք այդ քայլին, ինչը ես ողջունում եմ: Սա կրկես չէ, սա քաղաքականություն է»,- ասաց նա և հավելեց, որ մյուս ուժերն էլ պետք է առաջադրեին թեկնածու, որ մրցակցություն լիներ:

Ակնհայտ էր, որ Բալասանյանը նեղսրտել է քննադատություններից:  «Ինչի՞ եք քննադատում, կարելի՞ է երեք օր շարունակ տալ Բալասանյան անունը: Միայն մեկի նորմալ քննադատություն է եղել` Լևոն Բարսեղյանի կողմից: Միայն մենք 1.8 մլրդ փող ենք տալիս բյուջեին, ինչի՞ եք քննադատում, ես էդքան վա՞տ մարդ եմ, որ իմ անունն եք տալիս: Ծառայողական մեքենա չունեմ, բենզին չեմ օգտագործում, միայն 8 մլն դրամաշնորհ իմ շնորհիվ մտավ քաղաք: Կարելի՞ է  նման ձևով խոսել, վարկաբեկել: Ես Գյումրին շատ եմ սիրում, էսօր ամրոց եմ սարքել ձեզ համար, ինչի՞ եք քննադատում, ո՞ւմ եք գտնելու: Գողությո՞ւն ենք անում, կաշառք կա՞: Էս քաղաքում վերացել է կաշառքը, որևէ մեկը կաշառք վերցնո՞ւմ է, կրիմինալը հանեցինք քաղաքից, նրանց փակեցինք ծակերը, հետո նորից բաց թողեցին, ինչի՞: Անիրավ տեղը մի' քննադատեք, օբյեկտիվ եղեք, վատ բան կա, ցույց տվեք, ուղղենք: Դուք նման քաղաքապետ չեք էլ գտնելու, նենց մի' արեք որ մարդը ներվերից կտրվի: Ինձ որ կանչեն, ասեն հրաժարական տուր, ուրախ կլինեմ, բայց կափսոսամ ծրագրերս. ո՞վ է արել 40 կմ ասֆալտ քաղաքում, «Թումո» կենտրոնն է սարքվում: Ինչի՞ եք քննադատում 4 օր: Ոտը ոտին քցելով` մի' մեղադրեք: Եթե շատ ցանկություն ունեք, ես հրաժարական կտամ, բայց բերեք մի հատ նորմալ թեկնածու, որ կաշառք չի ուտի: Ինչի՞ եք մարդու հունից հանում»,- ասաց նա:

Բալասանյանը սկսեց թվարկել մի շարք բարեփոխումներ, որ իր շնորհիվ իրականացվել են քաղաքում, և նշեց. «Գյումրին առանց տնակների» ծրագիր ենք ստեղծել, 10 տարի ա իմ աշխատավարձը տալիս եմ այդ ծրագրին, ո՞վ է մի քոռ կոպեկ տվել: Երիտասարդ, ազնիվ մարդ բերեք, չգա, բյուջեին ձեռ տա, բյուջե եմ սարքել: Մենակ մի' քննադատեք, ասեք թերություն կա, գնամ նոր կառավարությանը խնդրեմ, ասեմ` նոր բնակարաններ տան մեզ: Շենք եմ գնել, որ բնակարան սարքեմ, ո՞վ է արել: Հելել եք փողոցները, ո՞ւմ եք ուզում հետ բերել»: